“Azərbaycanda idmanın inkişafı üçün hər cür şərait yaradılıb. Dünyada çox az ölkə var ki, orada idmana Azərbaycanda olduğu qədər dövlət dəstəyi göstərilsin. Aparılan dövlət siyasətinin nəticəsidir ki, ölkəmiz beynəlxalq aləmdə idman ölkəsi kimi tanınır. İdmançılarımız hərtərəfli qayğı ilə əhatə olunur ki, bu da onların beynəlxalq yarışlarda daha böyük uğurlar əldə etməsinə imkan yaradır. Azərbaycanda geniş idman infrastrukturunun mövcudluğu, müntəzəm olaraq qitə və dünya miqyaslı yarışların keçirilməsi, beynəlxalq idman yarışlarında qalib gələn idmançıların dövlətimiz tərəfindən mükafatlandırılması, ən əsası Azərbaycan Prezidenti cənab İlham Əliyevin idmançılara qayğısı gənclərdə bu sahəyə böyük maraq yaradır”.

“Xeber 7” məlumat verir ki, bunu mətbuata açıqlamasında Milli Məclisin deputatı Mehriban Vəliyeva bildirib.

Onun sözlərinə görə, bütün bölgələrdə olimpiya idman komplekslərinin, futbol meydançalarının və digər idman obyektələrinin tikilib istifadəyə verilməsi ölkəmizdə idmanın kütləviləşməsinə səbəb olub: “Bütün bunların nəticəsidir ki, hər il idmançılarımızın uğurları artır. Beynəlxalq yarışlarda iştirak edən həm idmançılarımızın, həm qazanılan medalların sayında artım var. Bu mənada 2024-cü ili də Azərbaycan idmanı üçün uğurlu il hesab etmək olar. İdmançılarımız beynəlxalq yarışlarda 1700-ə yaxın medal qazanıblar. İlin ən mötəbər idman yarışı Yay Olimpiya Oyunlarında tarixi nəticə əldə etdik. Müstəqil ölkə kimi 1996-cı ildən qatıldığımız Olimpiya Oyunlarında bu il ən yüksək yerə layiq görüldük. İki qızıl, iki gümüş, üç bürünc olmaqla yeddi medal qazandıq.İki yüzdən çox ölkənin qatıldığı yarışda 30-cu yerdə

qərarlaşmaq tarixi nailiyyətdir. Ən əhəmiyyətli məqamlardan biri də odur ki, Yay Olimpiya Oyunlarında Azərbaycan müzəffər ölkə kimi iştirak etdi. Döyüş meydanında qalib gələn ölkənin gəncləri beynəlxalq yarışlarda daha inamla iştirak edir, əzmli, iradəli olurlar. 44 günlük Vətən Müharibəsi nəticəsində əldə etdiyimiz qələbədən sonra keçirilən beynəlxalq yarışlarda idmançılarımızın özlərini necə inamlı və ləyaqətli apardıqlarının şahidi oluruq. Azərbaycan dövləti idmançılarımızın zəhmətini, uğurunu həmişə yüksək qiymətləndirib. Prezident İlham Əliyevin dekabrın 24-də idmançılarla görüşü bu qayğının, diqqətin göstəricisidir. Prezidentin 2024-cü ilin idman yekunlarına həsr olunan mərasimdə çıxışında səsləndirdiyi fikirlər, idmançıları mükafatlandırması Azərbaycan rəhbərliyinin bu sahənin problemlərini dərindən bildiyini və dövlət siyasətinin bütün sahələri tam əhatə etdiyini göstərdi”.

M.Vəliyeva qeyd etdi ki, hər bir gəncdə idmana maraq olmalıdır: “İdmanla məşğul olan gənclər daha sağlam, vətənpərvər, fiziki cəhətdən güclü, mənəvi cəhətdən saf olurlar. Güclü gəncin iradəsi, qətiyyəti də güclü olur və o, kənar təsir və təyiqlər qarşısında özünü dözümlü, səbrli aparır. Dövlətin idman siyasətinin əsas məqsədlərindən biri də budur. Sağlam vətəndaş, güclü xalq və qüdrətli dövlət... Bu üç faktor bir-biri ilə çox bağlıdır. Azərbaycan dövləti idmanın inkişafı üçün olimpiya kompekslərinin, stadionların və digər idman infrastrukturlarının sayını artıracaq. Cənab Prezident idmançılarla görüşündə bildirdi ki, azad edilmiş ərazilərə evlərlə yanaşı, idman infrastrukturu da yaradılır. Ağdamda İmarət stadionunun inşa edilməsi böyük rəmzi məna daşıyır. Hazırda Ağdamda bütün beynəlxalq standartlara cavab verən stadion inşa edilir. Füzuli şəhərində Olimpiya İdman Kompleksinin təməli qoyulub. Suqovuşan və Köndələnçay su anbarlarında artıq beynəlxalq avarçəkmə yarışları keçirilir. Şuşa şəhərində bir neçə idman yarışı keçirilib. Xankəndi stadionu əsaslı şəkildə təmir edilir. Gələn il Azərbaycan MDB Oyunlarına ev sahibliyi edəcək. Yarışlar 14 şəhərdə, xüsusilə də, Gəncədə  keçiriləcək. Gəncə şəhəri MDB Oyunlarının mərkəzi olacaq. Gəncədə yeni çox böyük Olimpiya İdman Kompleksi istifadəyə verilib, yeni stadion inşa edilir. Azərbaycanda idmana dövlətin həssas münasibətinin digər səbəbi, yəqin ki, həm də cənab Prezident İlham Əliyevin Milli Olimpiya Komitəsinin prezidenti olmasıdır. 1997-ci ildən MOK-a rəhbərlik edən Azərbaycan Prezidenti bu sahənin bütün problemlərini, inkişaf yollarını bilir. Həqiqətən də, əgər idmançılara dövlət qayğısı olmasa, bu sahə inkişaf edə bilməz. Hər il həm idmançılar, həm də idman ictimaiyyətinin nümayəndələri, məşqçilər, idman mütəxəssisləri dövlət tərəfindən mükafatlandırılır. Bu, onlarda növbəti qələbələrə stimul yaradır”.

M.Əliyeva onu da əlavə etdi ki, ölkə başçısının ad günündə idmançılarla görüşü zamanı söylədiyi fikirlərdə gənc nəslin fiziki və sağlam ruhda tərbiyəsi, yad təsirlərdən uzaq xalqa, vətənə sədaqətli vətəndaşlar kimi yetişməsi məsələsi də diqqət cəlb edir. Prezidentin gənc nəslə münasibəti hər zaman əsas istiqamətlərdən biri olub. Bu cəhətdən idmançıları işğaldan azad olunan ərazilərə tez-tez səfər etməyə dəvəti başadüşüləndir: “Yeniyetmə və gənclər arasında vətənpərvərlik hissinin aşlanmasında idmançıların rolu böyükdür. Bəzən yeniyetmə və gənclər idmançıların sözünü, çağırışlarını daha tez eşidirlər, onlara oxşamağa çalışırlar. İdmançılar müsbət lider kimi gənclərə nümunə olmalıdırlar. Onların tez-tez işğaldan azad olunan ərazilərə səfər etmələri bütün gənclərdə Qarabağa səfər etmək arzusunu formalaşdıracaq. Azad olunan ərazilərə səfər etmək, orada fəaliyyət göstərmək, yaşamaq nəticə etibarı ilə bu bölgənin güclənməsinə, inkişafına səbəb olacaq. Mən ümid edir və inanıram ki, idmançılar cənab Prezidentin çağırışlarına birmənalı əməl edəcək, onun etimadını doğruldacaqlar. Biz 2025-ci ildə idmançılarımızdan böyük nailiyyətlər gözləyirik”.