Yanvarın 14-də Birləşmiş Ərəb Əmirliklərinin paytaxtında Əbu-Dabi Dayanıqlılıq Həftəsinin rəsmi açılışı və Zayed Dayanıqlılıq Mükafatının təqdimat mərasimi keçirilib. Azərbaycan Respublikasının Prezidenti İlham Əliyev tədbirdə iştirak edib. Şübhəsiz ki, Azərbaycan Respublikasının Prezidentinin belə mötəbər tədbirə dəvət olunması beynəlxalq layihələrin təşəbbüskarı və icraçısı olan ölkəmizin beynəlxalq münasibəltər sistemində artan nüfuzunun əyani göstəricisidir. Qeyd etmək lazımdır ki, Azərbaycanın xarici siyasətində qarşılıqlı maraqlara hörmət prinsipi mühüm əhəmiyyət kəsb edir. Bunun nəticəsidir ki, istər regional, istərsə də daha geniş coğrafiyada Azərbaycan etibarlı tərəfdaş kimi nüfuzunu günü-gündən artırır. Prezident İlham Əliyevin yürütdüyü uğurlu xarici siyasət nəticəsində Azərbaycanın Avropa ölkələri, Türk dünyası ilə olduğu kimi, ərəb dövlətləri ilə münasibətləri də yeni inkişaf mərhələsinə qədəm qoyub. Bu mənada, Birləşmiş Ərəb Əmirlikləri ilə münasibətlər xüsusi əhəmiyyətə malikdir. Ümumiyyətlə, Azərbaycanla Ərəb Dövlətləri Liqası arasında əlaqələrin kifayət qədər tarixi var. 2005-ci ildən Azərbaycan Ərəb Dövlətləri Liqasında müşahidəçi statusa malikdir. Təbii ki, belə bir status bütövlükdə ərəb dünyası ilə Azərbaycan arasında çoxtərəfli əlaqələrin inkişafına mühüm töhfə verməkdədir.Qeyd etmək lazımdır ki, Birləşmiş Ərəb Əmirlikləri Azərbaycanın müstəqilliyini ilk tanıyan ölkələrdəndir. İki ölkə arasında diplomatic əlaqələr 1993-cü ildən qurulub. Bu gün bu əlaqələr kifayət qədər yüksək səviyyədədir. Onu da qeyd etməliyik ki, Birləşmiş Ərəb Əmirlikləri Azərbaycanın ərazi bütövlüyü məsələsində hər zaman açıq- aydın mövqe nümayiş etdirərək, ölkəmizin ərazi bütövlüyünü dəstəkləyib. Bütün bunlarla yanaşı, son illərdə BƏƏ də daxil olmaqla, bir sıra ərəb ölkələri ilə Azərbaycan arasında münasibətlərin dərinləşməsi müşahidə olunur. Bu baxımdan Prezident İlham Əliyev iki ölkə arasında münaisbətlərin dərinləşməsinə mühüm töhfədir.

Bu fikirləri saytımıza açıqlamasında Milli Məclisin üzvü Tamam Cəfərova deyib.

Deputat bildirib ki,  Dayanıqlılıq Həftəsinin əsas istiqamətləri qlobal əməkdaşlıq və liderlik, iqtisadi inkişaf və texnologiya, eləcə də innovasiya prinsipləridir. Əbu-Dabi Dayanıqlılıq Həftəsi dövlət və hökumət başçılarını, siyasətçiləri, sənaye liderlərini, iş adamlarını və gəncləri bir araya gətirir. Budəfəki Dayanıqlılıq Həftəsində 13 dövlət və hökumət başçısı, eləcə də 140-dan çox nazir və digər rəsmi şəxslər iştirak edib. Azərbaycan Prezidentinin bu mötəbər tədbirə dəvət olunması təbiidir. Ona görə ki, cənab Prezident İlham Əliyevin rəhbərliyi altında Azərbaycan çoxdan regional çərçivədən çıxaraq, beynəlxalq səviyyədə sülhün, təhlükəsizliyin xüsusilə də Avropanın enerji təhlükəsizliyinin təmin olunmasında öz sözünü demiş, imicini təsdiqləmiş dövlətdir. Artıq, Azərbaycan qlobal məsələlərin həlli istiqamətində rol oynayan güclü dövlətdir. Bu baxımdan, COP29 beynəlxalq tədbirini xatırlamağımız kifayətdir. Azərbaycan COP29-a yüksək səviyyədə ev sahibliyi etməklə və əldə olunan nəticələrlə beynəlxalq səviyyədə öz sözünü deyib.

Millət vəkili Tamam Cəfərova BƏƏ və Azərbaycan arasında yüksələn xətlə inkişaf edən münasibətlərə xüsusilə diqqət çəkərək deyib: “Ölkələrimiz arasında münasibətlər dostluq və qarşılıqlı etimad zəminində inkişaf edir. Azərbaycanla Birləşmiş Ərəb Əmirlikləri arasında əlaqələr əsasən beynəlxalq təşkilatlar, xüsusilə də BMT və İslam Əməkdaşlıq Təşkilatı çərçivəsində inkişaf edib. Hazırkı mərhələdə Azərbaycanla Birləşmiş Ərəb Əmirlikləri arasında əməkdaşlığın inkişafında enerji sektorunun xüsusi rolu var. Avropanın enerji təhlükəsizliyində mühüm rol oynayan Azərbaycan enerji resurslarının şaxələndirilməsi, eləcə də yaşıl enerji sahəsində önəmli təchizatçıya çevrilmə istiqamətində mühüm addımlar atır.