Türkiyənin Qars şəhərindəki Qafqaz Universitetində Azərbaycanın “Konstitusiya və Suverenlik İli”nə həsr olunmuş tədbir keçirilib.
AZƏRTAC xəbər verir ki, “Azərbaycan və Türkiyə mədəniyyətlərinin görüşü” mövzusunda tədbirin təşkilinə ölkəmizin Qarsdakı baş konsulluğu dəstək verib. Mədəni tədbirin təşəbbüskarı qismində isə Qafqaz Universitetinin, o cümlədən bu ali təhsil ocağının nəzdində fəaliyyət göstərən Konservatoriyanın tələbələri çıxış ediblər.
Azərbaycanın Qarsdakı baş konsulu Zamin Əliyev 1995-ci ildə ümumxalq səsverməsi yolu ilə qəbul edilmiş Azərbaycan Konstitusiyasının taleyüklü əhəmiyyətini vurğulayıb, 44 günlük Vətən müharibəsində qazanılan tarixi Qələbə, həmçinin ölkəmizin bütün ərazisində suverenliyin bərpasına imkan verən antiterror tədbirinin uğurları barədə məlumat verib. Diplomat Mustafa Kamal Atatürkün “Azərbaycanın sevinci sevincimiz, kədəri kədərimizdir” və Ümummilli Lider Heydər Əliyevin “Bir millət, iki dövlət” tarixi kəlamlarının Azərbaycan-Türkiyə münasibətlərinin əsas prinsipləri olduğunu, iki dövlətin qardaşlıq əlaqələrinin daha da möhkəmlənməsinə xidmət etdiyini vurğulayıb.
O, həmçinin Azərbaycan ilə Türkiyə arasında müttəfiqlik münasibətlərində ən parlaq səhifə açan Şuşa Bəyannaməsinin əhəmiyyətini vurğulayıb. Baş konsul əlavə edib: “Ölkələrimizin prezidentləri - İlham Əliyev və Rəcəb Tayyib Ərdoğan arasında qarşılıqlı hörmət və etimad iki dövlətin hərtərəfli və fəal dialoqunun açarıdır”.
Baş konsul ölkələrimizin iştirakı ilə regionda həyata keçirilən uğurlu layihələri, o cümlədən Qars-Naxçıvan dəmir yolu və İqdır-Naxçıvan qaz kəmərini yüksək qiymətləndirib.
O, tədbir iştirakçılarına Azərbaycanın zəngin mədəni-tarixi irsi haqqında məlumat verib, gəncləri xalqın çoxəsrlik dəyərlərini əziz tutmağa və qorumağa çağırıb.
Qars valisi Ziya Polat, şəhər bələdiyyəsinin başçısı professor Ötüken Senger və Qafqaz Universitetinin rektoru professor Hüsnü Kapu da tədbir iştirakçıları qarşısında çıxış ediblər.
Qars valisi Türkiyə ilə Azərbaycan arasındakı qardaşlığın sözdə deyil, əməldə özünü büruzə verdiyini vurğulayıb. O deyib: “Ölkələrimiz və liderlərimiz çox güclüdür. Dövlət başçılarının siyasi kursu bütün platformalarda əməkdaşlığın dərinləşdirilməsi üçün qüvvətli stimuldur. Əminəm ki, bu, gələcəkdə də davam edəcək”.
Sonra universitet tələbələrinin və müəllimlərin böyük maraqla qarşıladığı konsert proqramı təqdim edilib.
Tədbir tələbələr arasında keçirilən müsabiqənin qaliblərinin mükafatlandırılması ilə başa çatıb.