11 may tarixində Krasnoyarskda A.N. Kuznetsov adına Əmək və Həmrəylik Sarayında Azərbaycan Respublikasının Rusiya Federasiyasındakı fövqəladə və səlahiyyətli səfiri Rəhman Mustafayev ilə Krasnoyarsk diyarının Regional Azərbaycan Milli-Mədəni Muxtariyyətinin nümayəndələri və bölgədə yaşayan azərbaycanlı gənclər arasında rəsmi görüş keçirilib. Görüşdə həmçinin Azərbaycanın Yekaterinburqdakı Baş Konsulluğunun rəhbərinin səlahiyyətlərini icra edən Şöhrət Mustafayev, səfirliyin və baş konsulluğun əməkdaşları iştirak ediblər.

Tədbiri giriş sözü ilə açan Krasnoyarsk diyarının Regional Azərbaycan Milli-Mədəni Muxtariyyətinin sədri Taleh Mahmudov bu cür görüşlərin milli birliyin möhkəmləndirilməsi, gənclərin dəstəklənməsi və mədəniyyətlərarası dialoqun inkişafı baxımından mühüm əhəmiyyət daşıdığını vurğulayıb.

Görüş zamanı Azərbaycan-Rusiya münasibətlərinin inkişafına dair aktual məsələlər, eləcə də regiondakı Azərbaycan diasporunun fəaliyyəti ətrafında geniş fikir mübadiləsi aparılıb. Diasporun iki ölkə arasında iqtisadi, humanitar və mədəni əlaqələrin möhkəmləndirilməsində mühüm rol oynadığı xüsusi qeyd edilib.

Tədbir iştirakçıları Azərbaycan ilə Krasnoyarsk diyarı arasında humanitar əməkdaşlığın genişləndirilməsi və regionlararası əlaqələrin inkişafına yönəlmiş birgə gənclər və turizm layihələrinin həyata keçirilməsi perspektivlərini müzakirə ediblər.

Tədbirin fəxri qonağı Krasnoyarsk diyarı qubernatorunun Xarici Əlaqələr İdarəsinin rəisi Oksana Tsaryova olub. O, səfirə səfərinə görə təşəkkürünü bildirib və Regional Azərbaycan Milli-Mədəni Muxtariyyətinin üzvlərinə Krasnoyarsk diyarı qubernatorunun İctimai Əlaqələr İdarəsi adından təşəkkür məktubları təqdim edib. Həmçinin muxtariyyətin üç nümayəndəsi Krasnoyarsk diyarının qubernatoru Mixail Kotyukov adından təşəkkür məktubları ilə təltif olunub.

Görüşün sonunda Rəhman Mustafayev Azərbaycan icmasının və gənclərin çoxsaylı suallarını cavablandıraraq milli dəyərlərin qorunmasının, soydaşlara dəstəyin və Azərbaycan ilə Rusiya arasında dostluq münasibətlərinin daha da möhkəmləndirilməsinin vacibliyini vurğulayıb.