Mayın 13-də Azərbaycanın Rusiyadakı fövqəladə və səlahiyyətli səfiri Rəhman Mustafayev Sibir Federal Universitetini ziyarət edib və burada universitetin rektoru Maksim Rumyantsev ilə görüş keçirib.

Görüş zamanı tərəflər Sibir Federal Universiteti ilə Azərbaycanın ali təhsil müəssisələri arasında əməkdaşlığın inkişaf perspektivlərini müzakirə edib, akademik və elmi mübadilələrin aktivləşdirilməsi, birgə təhsil layihələrinin həyata keçirilməsi imkanlarını nəzərdən keçiriblər.

Səfər çərçivəsində səfir həmçinin 2020-ci ildə fəaliyyətə başlayan və Rusiyada restoran biznesi sahəsində ali təhsil verən ilk təhsil müəssisəsi olan Sibir Federal Universitetinin Qastronomiya İnstitutu ilə də tanış olub.

Görüşdən sonra səfir tələbələr qarşısında mühazirə ilə çıxış edib. O, çıxışında dünya və regiondakı aktual məsələlər, Azərbaycanın xarici siyasətinin prioritetləri və istiqamətləri, həmçinin Azərbaycan-Rusiya münasibətlərinin hazırkı vəziyyəti barədə danışıb. Azərbaycan Gənclər Birliyinin fəalları da mühazirədə iştirak ediblər. Mühazirədən sonra səfir tələbələrin çoxsaylı suallarını cavablandırıb.