“Аzərbaycan Demokratik Tələbə Gənclər Təşkilatı” İctimai Birliyinin(ADTGT) sədri Asif Əsgərli və İB-in icraçı direktoru Gülnarə Bağırova cari ilin 29 iyun - 03 iyul tarixində Finlandiyanın Helsinki şəhərində “Skandinaviya, Baltik və Qafqaz dialoqu 2026: Mədəniyyət, Gənclər və Gender bərabərliyi” adlı Beynəlxalq Forumda iştirak edəcəklər. 

Gənclər və İdman Nazirliyinin maliyyə dəstəyi ilə gerçəkləşən səfər çərçivəsində ADTGT təmsilçiləri 10 ölkənin gənclər QHT rəhbərləri, gənc liderlər və ekspertlərin qatılacağı Forumda müxtəlif panel müzakirələrində iştirak edib, təqdimatlarla çıxış edəcəklər, bir çox hökumət və digər qurumlarda görüş və tanışlıqlarda iştirak edəcəklər. 

Forumda Azərbaycan gənclər təşkilatları rəhbərləri “Gender bərabərliyi təcrübədə: Skandinaviya modelləri və Qafqaz reallıqları”, “Gənclər dəyişiklik agentləri kimi: Şimal və Qafqaz gənclər QHT-nin perspektivləri”, “Gənclərin rəhbərlik etdikləri dialoq və mədəni diplomatiya”,  “Gənc qadınlar və etnik azlıq gəncləri üçün rəqəmsal alətlər və təhlükəsiz onlayn məkanlar” və “Mədəni mübadilədən struktur dəyişikliyinə: Gənclər əslində nələr edə bilər” mövzularında geniş təqdimatlar nümayiş etdirəcəklər.  

Forumun yekununda Azərbaycan gənclər təşkilatı olaraq ADTGT eləcədə Skandinaviya, Baltik və Qafqaz regionundan olan digər QHT arasında davamlı əməkdaşlıq və tərəfdaşlıq şəbəkəsinin təsis olunması və requlyar fəaliyyət göstərməsinə dair anlaşma memorandumu imzalanacaqdır.

Eyni zamanda ADTGT Azərbaycan QHT-ləri ilə zəif əlaqə və əməkdaşlığı olan Finlandiya, Latviya, İsveç, Danimarka və Estoniya QHT-ləri ilə də davamlı tərəfdaşlığa dair sazişlər də imzalamağı nəzərdə tutur.