Milli dövlətçiliyin bərpası, Azərbaycanın daxili və xarici düşmənlərdən qorunması, dünya miqyasında ölkəmizin layiqli yerini tutması missiyasını yalnız Ulu Öndər Heydər Əliyev reallaşdıra bilərdi. Burada onun unudulmaz sözləri yada düşür: “Mən bu zamanın, bu dəqiqələrin, bu saatın hökmünü nəzərə almaya bilməzdim. ... Mən öz prinsiplərimə sadiq qalaraq Azərbaycanın, Naxçıvanın belə vəziyyətində, çətin günündə, dövründə mənim üzərimə düşən vəzifənin icrasından geri çəkilə bilməzdim. Mən öz taleyimi xalqa tapşırmışam və xalqın iradəsini indi bu müddətdə, bu çətin dövrdə yerinə yetirməliyəm”. Məhz bu fikirləri rəhbər tutan Böyük Lider bütün təhlükələrə rəğmən mühüm tarixi missiyasını möhtəşəm formada həyata keçirmişdir.
Keçən əsrin 90-cı illərin əvvəlində Naxçıvan Muxtar Respublikasının blokada şəraitində olması, qəddar düşmənin hücumlarına məruz qalması, gərgin sosial-iqtisadi durumun mövcudluğu, o zamankı hakimiyyətin siyasi şəriştəsizliyi, Naxçıvanın vəziyyətini həddindən artıq mürəkkəbləşdirmişdi. Yalnız Heydər Əliyevin Ali Məclisin Sədri seçildiyi zamandan başlayaraq, onun gərgin fəaliyyəti və böyük səyləri sayəsində Naxçıvanın müdafiə qabiliyyəti gücləndirildi, muxtar respublikada sabitlik, əmin-amanlıq təmin edildi, sosial-iqtisadi vəziyyətin yaxşılaşdırılması istiqamətində ardıcıl və məqsədyönlü addımlar atıldı. Məhz Ulu Öndərin sarsılmaz iradəsi və uzaqgörənliyi nəticəsində Naxçıvanda yerləşən SSRİ silahlı qüvvələrinə məxsus hərbi texnika, silah, sursatın muxtar respublikada saxlanılması təmin olunmuşdu, diğər tərəfdən Ali Məclisin 7 sentyabr 1991-ci il tarixli qərarına əsasən Dövlət Müdafiə Komitəsinin yaradılması muxtar respublikanın təhlükəsizliyinin təmin edilməsində əhəmiyyətli rol oynamışdır.
Ulu Öndərin unudulmaz xidmətlərindən biri də, məhz onun təşəbbüsü ilə Azərbaycan Xalq Cümhuriyyətinin üçrəngli Dövlət bayrağının Ali Məclisin 1990-cı il noyabrın 17-də keçirilən sessiyasında Naxçıvan Muxtar Respublikasının dövlət bayrağı olaraq təsdiq edilməsi olmuşdur. 1991-ci il fevral ayının 5-də muxtar respublikanın vəsatətinə baxaraq, Azərbaycan Respublikasının Ali Soveti “Azərbaycan Respublikasının Dövlət bayrağı haqqında” Qanun qəbul edərək, üçrəngli bayrağı yenidən Dövlət bayrağı elan etmişdir. Ümummilli Lider xüsusi olaraq vurğulamışdır ki, “Naxçıvan Muxtar Respublikası Ali Məclisinin qəbul etdiyi qərarlar Azərbaycan Respublikasının işinə çox təsir etdi və Azərbaycan rəhbərliyi bir neçə belə qərarın qəbul edilməsində məcburiyyət qarşısında qaldı. Naxçıvan Muxtar Respublikasının üzərində bu bayraq 1990-cı il noyabrın 17-də, Azərbaycan Respublikasında isə 1991-ci il fevralın 5-də dalğalandı”.
Azərbaycanın siyasi tarixinin unuldulmaz şəxsiyyəti olan Heydər Əliyevin fədakar fəaliyyəti Naxçıvan Muxtar Respublikasının həyatının bütün sahələrində özünü biruza vermişdir və burada yaşayan insanların sosial-iqtisadi rifahının gücləndirilməsinə, tərəqqinin əldə edilməsinə, milli həmrəyliyə nail olunmasına xidmət etmişdir. Dövlətimizin ən mürəkkəb, keşməkeşli dövründə Ümummilli Lider Azərbaycanı siyasi burulğanlardan çıxararaq, böyük tarixi missiyanı gerçəkləşdirmişdir.
Nizami Səfərov, Milli Məclisin Hüquq siyasəti və dövlət quruculuğu komitəsinin üzvü
