İtaliya ilə tərəfdaşlığımız uğurla həyata keçirilir. Bizim ikitərəfli gündəliyimiz getdikcə genişlənir. Təbii ki, bunun əsas hissəsini enerji və ticarət təşkil edir. Lakin bunlar yeganə mövzular deyil. Dünən səfirliyimizin yeni binasında biz İtaliya-Azərbaycan Universitetinin yaradılması ilə bağlı sənədlərin mübadiləsinə həsr edilmiş gözəl mərasimin şahidi olduq.AZƏRTAC xəbər verir ki, bu barədə Prezident İlham Əliyev İtaliyanın “İl Sole 24 Ore” qəzetinə müsahibəsində iki ölkə arasında coxşaxəli strateji tərəfdaşlıqla bağlı suala cavabında bildirib.Dövlətimiz başçısı deyib: “Biz Avropa İttifaqı-Azərbaycan tərəfdaşlığı çərçivəsində fəal əməkdaşlıq edirik. İtaliya hər zaman Azərbaycanın Avropa İttifaqı ilə yaxınlaşmasını güclü şəkildə dəstəkləyib. İtaliya hər zaman bizim NATO ilə daha sıx əməkdaşlıq qurmaq səylərimizi dəstəkləyib. Əlbəttə, bu gün Bakını İtaliya sahilləri ilə birləşdirən 3500 kilometrlik enerji körpüsü enerji təhlükəsizliyi körpüsüdür. Bu, təkcə İtaliyaya şamil edilmir. Əminəm ki, İtaliya Azərbaycanın karbohidrogen resurslarını Avropanın digər yerlərinə ötürəcək ölkə olacaqdır”.

İkitərəfli gündəlikdə enerji seqmenti, iqtisadiyyat və ticarətin inkişafı mövzularının olduğunu deyən Prezident İlham Əliyev qeyd edib ki, İtaliya Azərbaycanın əsas ticarət tərəfdaşıdır. Bundan başqa, təhsil, mədəniyyət və bir sıra digər sahələr var, yəni, strateji tərəfdaşlıqla bağlı bəyanat fəaliyyətdədir.