İtaliya Prezidenti Sercio Mattarellanın dəvəti ilə Prezident İlham Əliyevin sentyabrın 1-2-də İtaliyaya işgüzar səfəri həm də ölkələrimiz arasında diplomatik münasibətlərin qurulmasının 30 illiyinə təsadüf edib. Prezident İlham Əliyevin İtaliyaya sonuncu səfəri isə sayca yeddincidir.Bu sözləri AZƏRTAC-a açıqlamasında Ana Vətən Partiyası sədrinin müavini Yalçın Hacızadə söyləyib.O qeyd edib ki, İtaliya Azərbaycanın Avropa İttifaqı (Aİ) ölkələri arasında ən yaxın tərəfdaşıdır. Bu səfər də konkret məqsədlər və hədəflər daşıdığı üçün ölkələr arasında münasibətlərin inkişafında, etimadın güclənməsində böyük əhəmiyyətə malik olacaq.İtaliya iqtisadi və digər göstəricilərinə görə dünyanın səkkizinci böyük ölkəsidir. Həmçinin Avropa İttifaqının və NATO-nun da aparıcı ölkələrindən biridir. İtaliya-Azərbaycan münasibətlərinin inkişafı Aİ və NATO ilə də əlaqələrimizin genişlənməsində rol oynayır. Yəni, belə səfərlər münasibətlərimizin təkcə ikitərəfli deyil, həm də çoxtərəfli inkişafı üçün yeni imkanlar yaratmış olur.“Prezident İlham Əliyevin 2020-ci il fevralın 19-21-də İtaliyaya olan dövlət səfərində 28 sənəd imzalanıb. Həmin sənədlər arasında “Çoxölçülü Strateji Tərəfdaşlığın gücləndirilməsinə dair Birgə Bəyannamə”nin xüsusi əhəmiyyəti var. Bu sənəd iki ölkə arasında münasibətlərin inkişafında başlıca plandır. Eyni zamanda, siyasi dialoq, ticari-iqtisadi münasibətlər, enerji, nəqliyyat-kommunikasiya, elm, təhsil, mədəniyyət, humanitar, müdafiə sahələrində əlaqələrin inkişafına dair xeyli məsələləri özündə əks etdirir.Azərbaycanın Avropa İttifaqının 27 dövlətindən doqquzu ilə strateji tərəfdaşlıq münasibətləri var. İtaliya “Qoca qitə”də Azərbaycanın ən yaxın ticari-iqtisadi tərəfdaşıdır. Avropa ölkələri içərisində Azərbaycan neftinin birinci və qazının isə üçüncü ən böyük alıcısı məhz İtaliyadır”, - deyə politoloq vurğulayıb.Y.Hacızadə bildirib ki, səfər çərçivəsində İtaliyada Azərbaycan səfirliyinin yeni binasının istifadəyə verilməsi və Prezident İlham Əliyevin keçirdiyi digər görüşlər iki ölkə arasındakı münasibətləri yeni müstəviyə qaldıracaq.Bilirsiniz ki, İtaliyada hökumət istefaya gedib və bu da böhranının yaranmasına səbəb olub. Buna görə də sentyabrın 25-də İtaliyada parlament seçkiləri keçiriləcək. Belə vəziyyətlərdə İtaliyaya rəsmi və işgüzar səfərlər olmur, həmçinin oraya dövlət nümayəndələri gəlmir. Buna baxmayaraq, Azərbaycan Prezidentinə münasibətdə istisna hal baş verdi və dövlətimizin başçısı İtaliyaya səfər etdi. Əlbəttə ki, bu yanaşma Prezident İlham Əliyevin şəxsiyyətinə, dünya görüşünə, diplomatik qabiliyyətinə olan yüksək etimadın ifadəsidir.

O əlavə edib ki, İtaliya Avropada hazırda yaşanan enerji böhranından ən az təsirlənən və gələcəkdə bu istiqamətdə baş verə biləcək təhlükələrdən sığortalanan ölkədir. Bu da İtaliyanın Azərbaycan kimi etibarlı, dayanıqlı siyasət aparan ölkələrlə əməkdaşlığının nəticəsidir.