Bu Zəfər xalqımızın yaddaşından heç zaman silinməyəcək və eyni zamanda dünya hərb tarixində qızıl hərflərlə yazılacaq

 Azərbaycan dövləti hər zaman beynəlxalq hüquq normalarından çıxış edərək ölkələrin suverenliyinə və ərazi bütövlüyünə hörmətlə yanaşıb, sülhün və sabitliyin tərəfdarı olub. Buna baxmayaraq, Azərbaycan 30 il ərzində işğaldan əziyət çəkən bir ölkə olmuşdur. Azərbaycan 2020-ci ildə öz tarixi torpaqlarını erməni işğalından azad edərək tarixi ədaləti bərpa etmişdir. Müzəffər Azərbaycan Ordusu Ali Baş Komandanın rəhbərliyi altında 44 gün ərzində qəhrəmanlıq nümayiş etdirdi. Vətən müharibəsi Ermənistanın hərbi kapitulyasiyası ilə nəticələndi. Azərbaycan tarixi Zəfərə nail oldu və bəşəriyyətə tarixi ədaləti şəhidlərin qanı ilə bərpa etdiyini göstərdi. Buna görə də şəhidlərin xatirəsi dünya azərbaycanlıları üçün daimi əzizdir. 27 sentyabr-Anım Günündə Prezident İlham Əliyev Füzuli rayonunda çıxışı zamanı qeyd etdiyi kimi, bütün Azərbaycan xalqı şəhidlərimizin əziz xatirəsini yad edir: “Şəhidlərimiz Vətən, torpaq uğrunda öz canlarını fəda etdilər. Biz öz şəhidlərimizlə fəxr edirik. Şəhidlərimizin qanı yerdə qalmadı, biz şəhidlərimizin qanını aldıq. Döyüş meydanında qisasımızı aldıq. Doğma torpaqlarımızı düşməndən azad etdik, ölkəmizin ərazi bütövlüyünü bərpa etdik”.
 Vətən müharibəsində dünya azərbaycanlıları yumruq kimi birləşərək haqsız güclərin üstünə getdi və dünyaya sübut etdi ki, haqq yolunda, ərazi bütövlüyünun bərpası uğrunda vuruşub. Ali Baş Komandanın “Qarabağ Azərbaycandır!” şüarı Zəfər yoluna işıq saldı. Cənab Prezident Füzuli rayonunda bildirib ki, 44 günlük Vətən müharibəsi şanlı tariximizdir: “Azərbaycan xalqı bütün gücünü səfərbər edib, yumruq kimi birləşərək düşməni doğma torpaqlarımızdan qovdu”. Bu Zəfər döyüş meydanında təkcə tanklarla, toplarla deyil, eyni zamanda ağılla, zəka ilə qazanıldı. Bütün bunlar da Ali Baş Komandan İlham Əliyevin diplomatik səriştəsi və qətiyyəti sayəsində baş verdi.
 Vətən müharibəsində Azərbaycan əsgəri şücaət və rəşadət nümayiş etdirdi. Düşmənin 30 il ərzində qurduğu nəhəng istehkamları 44 gün ərzundə darmadağın edildi. Yeri gəlmişkən, sentyabrın 27-də Prezident İlham Əliyev və birinci xanım Mehriban Əliyeva Füzuli rayonuna səfəri heç də təsadüfi deyil. Dövlətimizin başçısı və birinci xanım Füzuli rayonunun Qaraxanbəyli kəndində 27 Sentyabr – Anım Gününə həsr olunmuş xatirə lövhəsinin önünə gül dəstələri qoyublar. Şəhidlərin Anım Günündə Füzuli rayonuna belə səfərin edilməsi rəmzi xarakter daşıyır. Çünki Vətən müharibəsində ilk şəhidlərimiz məhz bu torpaqlar uğurunda gedən döyüşlərdə olub və elə ilk olaraq da bu ərazilər işğaldan azad edilib. Ali Baş Komandan özü də çıxışında bu məqama toxunaraq bildirdi ki, şəhidlərimizin şərəfinə Qaraxanbəyli kəndinin yaxınlığında qaya parçasında abidə ucaldılıb: “Qaraxanbəyli kəndi və digər beş kənd İkinci Qarabağ müharibəsinin ilk günündə azad edilmişdir. Qaraxanbəyli, Qərvənd, kənd Horadiz, Yuxarı Əbdürrəhmanlı - Füzuli rayonunun kəndləri və Cəbrayıl rayonunun kəndləri - Böyük Mərcanlı və Nüzgar kəndi müharibənin ilk günündə azad edilmişdir”. 
Bu gün böyük iftixar hissi ilə qeyd edirik ki, Vətən müharibəsində Zəfər qazanmağımızda xalq-Prezident-ordu birliyinin mühüm əhəmiyyəti var. Bu, həm də Azərbaycan xalqının, Prezidentinin və ordusunun gücünun bariz nümunəsidir. Cənab Prezidentin Füzulidə qeyd etdiyi kimi, bütün Azərbaycan xalqı 44 günlük Vətən müharibəsində birlik, iradə göstərib. Bu Zəfər xalqımızın yaddaşından heç zaman silinməyəcək və eyni zamanda dünya hərb tarixində qızıl hərflərlə yazılacaq.

Qasımov Səyavuş Kamran oğlu, 
Avrasiya Universitetinin Beynəlxalq əlaqələr üzrə prorektoru, siyasi elmlər üzrə fəlsəfə doktoru, dosent