Bakı Şəhər Mədəniyyət Baş İdarəsi Yasamal rayon MKS-nin M.Ş.Vazeh adına Mərkəzi Kitabxanasında və 1, 2, 3, 4№-li kitabxana filiallarında 2024-cü il sentyabrın 1-də Azərbaycan Respublikasının Milli Məclisinə növbədənkənar seçkilərin keçirilməsi ilə bağlı deputatlığa namizədlər, onların vəkilləri, müşahidəçilər, məşvərətçilər və seçicilər üçün maarifləndirici sərgilər təşkil olunub.

Sərgilərdə “Altıncı çağırış Azərbaycan Respublikası Milli Məclisinin buraxılması və Azərbaycan Respublikasının Milli Məclisinə növbədənkənar seçkilərin təyin edilməsi haqqında” Azərbaycan Respublikası Prezidentinin 2024-cü il 28 iyun tarixli Sərəncamı, Azərbaycan Respublikasının Konstitusiyası, Seçki Məcəlləsi, müxtəlif təlimatlar və məlumat bülletenləri nümayiş olunur.

Bütün kitabxanalarda parlament seçkiləri ilə bağlı maarifləndirici xarakter daşıyan plakatlar da vurulub. 

İlk dəfə seçkilərdə iştirak edən seçicilər üçün “Dəyirmi masa”ların təşkili də nəzərdə tutulub.