Elşən Uluxanlı Milli Qəhrəmana ev verildiyinə görə Prezidentə və nazirə təşəkkür etdi
Azərbaycanın Milli Qəhrəmanı Natiq Qasımovun anası Dursun Qasımovaya ev verilib. Bu barədə Əmək və Əhalinin Sosial Müdafiəsi Nazirliyinin (ƏƏSMN) İctimaiyyətlə Əlaqələr və Kommunikasiya şöbəsinin müdiri Fazil Talıbov feysbuk səhifəsində məlumat verib: “Bu gün Əmək və Əhalinin Sosial Müdafiəsi Nazirliyi tərəfindən şəhid Milli Qəhrəman Natiq Qasımovun anası Dursun Qasımovaya Gəncə şəhərində yerləşən MİDA yaşayış kompleksindən ikiotaqlı, tam təmirli mənzil təqdim edilib. Qeyd edim ki, Prezident İlham Əliyevin 25 iyun 2024-cü il Sərəncamına əsasən, Natiq Səlim oğlu Qasımova “Azərbaycanın Milli Qəhrəmanı” adı verilib. Allah bütün şəhidlərimizə rəhmət eləsin!”, – deyə o bildirib.
Qeyd edək ki, bir müddət əvvəl Natiq Səlim oğlu Qasımova “Azərbaycanın Milli Qəhrəmanı” adı verilməsi ilə əlaqədar onun anası Qasımova Dursun Əsgər qızına Prezident təqaüdü təyin edilmişdi.
Azinforum.az olaraq xatırladırıq ki, Milli Qəhrəman Natiq Qasımovun anasının çətin şəraitdə yaşadığını və onun yeni mənzilə ehtiyacı olduğu mövzusunu ilk dəfə bizim sayt ictimailəşdirib. Milli Qərəmanları Tanıtma İctimai Birliyinin sədri Elşən Uluxanlı yazdığı və bizim tərəfimizdən içtimailəşdirilən məqalədə Natiq Qasımovun anasının mənzilə ehtiyacı olduğu qabardılırdı. Hətta onun neçə çətin şəraitdə yaşadığını əks etdirən fotolar da təqdim edilmişdi. Elşən Uluxanlı öz yazısında Gəncənin icra başçısını bu məsələyə laqeyd yanaşmaqda ittiham edirdi. Həmin vaxt məhz Gəncə Şəhər İcra Hakimiyyətinə trolluq edən bir qrup şəxs sosial şəbəkəlır vasitəsilə Elşən Uluxanlının və bizim üzərimizə hücuma keçdilər ki, Natiq Qasımovun anası icra başçısının bütün “qayğısı” və “mərhəməti” ilə əhatə edilib, bu səbəbdən də, belə məlumatları yaymaq təxribatdır.
Mili Qəhrəmanları Tanıtma İctimai Birliyinin sədri Elşən Uluxanlı Azinforum.az-a açıqlamasında bildirdi ki, bu xəbəri böyük sevinclə qarşılayıb: “Mən fürsətdən istifadə edib, bu qərarın qəbul edilməsinə görə, ölkə Prezidentinə, Əmək və Əhalinin Sosial Müdafiəsi Nazirliyinə dərin minnətdarlığımı bildirirəm. Çox sevinirəm ki, çağrışımıza səs verildi”.
Azinforum.az
