Eyni zamanda, “tənqid et - təklif et” prinsipi ilə hərəkət edən Eldar Əzizovun çıxışı nədənsə bəzi ictimaiyyət və bir sıra yerli bloqçuların narazılığına səbəb olub. Paytaxt İcra Hakimiyyətinin başçısı bildirib ki, leysan yağışları zamanı təhlükəni minimuma endirmək üçün müvəqqəti tədbir kimi güclü yağışlar zamanı avtonəqliyyat vasitələrinin tunellərə və yeraltı keçidlərə girişinə məhdudiyyət qoyulmalıdır.

Məncə, çox məntiqli təklifdir. Məsələnin mahiyyətini öyrənməkdənsə, emosional düşünməyə öyrəşmiş şəxslər üçün nəzərinizə çatdırım ki, Eldar Əzizov nou-hau təklif etmir. Güclü yağış zamanı tunellərə girişin bağlanması təcrübəsi bir çox ölkələrdə mövcuddur - bu, daşqın və qəzaların qarşısını almağa kömək edən təhlükəsizlik tədbiridir. Bu, xüsusilə yağışların intensiv olduğu və suyun səviyyəsinin kəskin yüksəlməsi ilə müşayiət olunan bölgələrə aiddir.

Su səviyyəsinin sensorları və avtomatik maneələrdən istifadə etməklə və ya əl ilə, yol xidmətlərinin mülahizəsinə uyğun olaraq belə bağlanmalar avtomatik olaraq baş verə bilər. Bir sıra ölkələrdə hətta tunellərdə xüsusi drenaj sistemləri və nasos stansiyaları var, lakin onların işi uğursuz olarsa bu zaman giriş bloklanır.

Məsələn, Barselona və Madriddə güclü yağış zamanı bələdiyyə orqanları tunelləri və yeraltı keçidləri müvəqqəti bağlaya bilər. Xəbərdarlıq sistemləri və avtomatik maneələr var. Daha dəqiq desək, 2022-ci ildə Madriddə güclü yağış zamanı Avropanın ən böyük tunellərindən biri olan Calle 30 tunelinin bir hissəsi müvəqqəti bağlandı.

Seulda da suyun səviyyəsi icazə verilən həddi keçdikdə tunellərə girişi bağlayan avtomatlaşdırılmış sistem var. Burada kameralar və sensorlardan istifadə olunur. Dorimcheon Tuneli tayfunlar və güclü yağışlar zamanı mütəmadi olaraq bağlanır.

Los-Anceles və Nyu-Yorkda daşqınlar və qasırğalar zamanı (məsələn, 2012-ci ildə Sandy kimi) daşqın və insan tələfatının qarşısını almaq üçün tunellər əvvəlcədən bağlanır. Xüsusi hermetik qapılar metrolarda və avtomobil tunellərində istifadə olunur.

Nəhayət, Münhen və Hamburqda güclü yağış proqnozlaşdırılarsa, tunellər (məsələn, dairəvi yollarda) müvəqqəti bağlana bilər. Bu, çox vaxt yol nişanlarında mesajlarla müşayiət olunur.

Belə çıxır ki, Eldar Əzizov heç də özünün deyil, “Azərsu” ASC-nin günahkar olduğu problemin həlli üçün mövcud xarici təcrübənin mənimsənilməsini təklif edir. Bu, əgər məsələnin mahiyyətini öyrənərək, emosiyalar olmadan, vicdanla düşünsək aydın görünür. Başqa halda  emosional və fərq qoymadan baş verənlərə görə hətta 26 Bakı komissarını günahlandırmaq olar.