Bakı Ekspo Mərkəzində keçirilən 19-cu Azərbaycan Beynəlxalq Kənd Təsərrüfatı Sərgi və Forumu – “Caspian Agro Week” və 31-ci Azərbaycan Beynəlxalq Qida Sənayesi Sərgisi – “InterFood Azerbaijan” çərçivəsində Qida Təhlükəsizliyi Hərəkatının nümayəndələri sərgini ziyarət edərək müxtəlif innovativ layihə və xidmətlərlə yaxından tanış olublar.

Mustaqil.az xəbər verir ki, Qida Təhlükəsizliyi Hərəkatının rəhbəri Məhsəti Hüseynova, Gənclərin Töhfəsi İctimai Birliyinin sədri Asim Vəliyev, Peşəkar Qənnadçılar İctimai Birliyinin sədri Eynur Nağdəliyev və bir qrup könüllü sərgidə iştirak edərək kənd təsərrüfatı və qida sənayesi sahəsində təqdim olunan yenilikləri izləyiblər.

Sərgi zamanı iştirakçıların xüsusi marağına səbəb olan layihələrdən biri ölkəmizdə ilk dəfə tətbiq olunacaq Səyyar Baytarlıq Xidməti olub. Aqrar Xidmətlər Agentliyinin mütəxəssisi Şaiq Teyyubov tərəfindən təqdim edilən məlumatda bildirilib ki, yeni xidmət vasitəsilə ən ucqar kənd və yaşayış məntəqələrində belə çöl şəraitində bütün növ heyvanlar üçün cərrahi əməliyyatlar, ultrasəs müayinəsi və steril şəraitdə təcili tibbi yardım xidmətləri həyata keçiriləcək.

Qeyd olunub ki, layihənin əsas məqsədi fermerlər üçün baytarlıq xidmətlərinə əlçatanlığı artırmaq, xəstəliklərin ilkin mərhələdə aşkarlanmasını təmin etmək və fermer təsərrüfatlarına dəyən zərəri minimuma endirməkdir.

Məlumata əsasən, səyyar baytarlıq avtomobili iki hissədən — klinik və texniki bölmədən ibarətdir. Avtomobildə müasir baytarlıq xəstəxanasında mövcud olan bütün zəruri avadanlıqlar yerləşdirilib. Eyni zamanda, ən son texnologiyalarla təchiz olunmuş laboratoriya və tibbi avadanlıqlar vasitəsilə yerində operativ və peşəkar xidmət göstərilməsi mümkün olacaq.

Bu cür tədbirlər gənclərin innovativ düşüncə tərzinin formalaşmasına, beynəlxalq təcrübənin öyrənilməsinə və ölkədə aqrar və qida sektorunun inkişafına marağın artmasına səbəb olur. Müasir texnologiyaların tətbiqi, yeni xidmət modellərinin təqdim olunması və maarifləndirici platformaların yaradılması gələcəkdə bu sahələrin daha da inkişaf etməsinə və peşəkar kadr potensialının güclənməsinə şərait yaradır.