Binəqədi Rayon İcra Hakimiyyəti yanında İctimai Şuranın üzvlərinin növbəti toplantısı mayın 12-də keçirilib. Toplantıda rayonun ictimai həyatında vətəndaş iştirakçılığının gücləndirilməsi, dövlət–ictimai əməkdaşlığının genişləndirilməsi və qarşıda duran prioritet istiqamətlər ətrafında geniş fikir mübadiləsi aparılıb.

Görüşü giriş nitqi ilə açan İctimai Şuranın sədri İradə Rzazadə şuranın fəaliyyət istiqamətləri, qarşıya qoyulmuş əsas vəzifələr və onların icrası məqsədilə hazırlanmış fəaliyyət planı barədə ətraflı məlumat verib. Bildirilib ki, fəaliyyət planında vətəndaş müraciətlərinin operativ araşdırılması, ictimai nəzarət mexanizmlərinin təkmilləşdirilməsi, sosial məsələlərin yerində öyrənilməsi, həmçinin əhali ilə açıq dialoq mühitinin genişləndirilməsi xüsusi yer tutur.

Daha sonra toplantı çərçivəsində fəaliyyət planına uyğun olaraq müxtəlif istiqamətlər üzrə müzakirələr aparılıb. İctimai Şura üzvləri sosial layihələrin icrası, maarifləndirmə tədbirlərinin təşkili, şəhid ailələri və qazilərlə iş, gənclərin ictimai proseslərə cəlb olunması, ekoloji təşəbbüslər və digər aktual məsələlərlə bağlı təkliflərini səsləndiriblər.