Yasamal rayon Mərkəzləşdirilmiş Kitabxana Sisteminin M.Ş.Vazeh adına Mərkəzi Kitabxanası və İ.Əbilov adına Mədəniyyət Mərkəzinin birgə təşkilatçılığı ilə “Şəhidlər ölməz, Vətən bölünməz” tədbirlər çərçivəsində Laçın rayonunun cəsarətli qızı, filoloq-müəllim, şəhid Səma Aydın qızı Kərimovanın əziz xatirəsinə həsr olunmuş “Göylər mələyi” adlı xatirə gecəsi keçirdilər. 
Tədbirin əvvəlində Azərbaycanın ərazi bütövlüyü uğrunda şəhid olmuş insanların əbədi və əziz xatirəsi bir dəqiqəlik sükutla yad edildi.
Tədbirin aparıcısı tarix üzrə fəlsəfə doktoru, Fəxri mədəniyyət işçisi, Yasamal rayon MKS-inin direktoru Lətifə Məmmədova qonaqları salamladı və bildirdi ki, şəhidlər – bizim iftixarımız, qürur mənbəyimizdir. Aparıcı Ulu Öndər Heydər Əliyevin, Azərbaycan Respublikasının Prezidenti İlham Əliyevin və Birinci vitse-prezident Mehriban Əliyevanın çıxışlarından şəhidlər haqqında sitatlar gətirdi. 
L.Məmmədova Səma Kərimovanın Laçının Nağdalı kəndində başlayan mənalı ömür yolundan, onun tələbəlik və müəllimlik illərindən danışdı. O, Laçının işğalı zamanı ailəsi ilə birlikdə yaşadıqları çətin günlərdən bəhs etdi. Vurğuladı ki, vətənsevər Səma xanımın işıqlı obrazı və adı hər bir azərbaycanlının qəlbində əbədi yaşayacaqdır.
“Köhnə çamadanlar” filminin ssenari müəllifi və rejissoru Səidə Haqverdiyeva çıxışında vurğuladı ki, filmi ərsəyə gətirərkən Qarabağ ağrısını və köçkünlük həyatını yaşayan qadınlarımızın fədakarlığını gələcək nəsillərə ötürməyi hədəfləyib. 
Laçın rayon İcra Hakimiyyəti başçısının müavini Aynurə Həsənova çıxışında qeyd etdi ki, Laçın torpağı tarix boyu məğrur, vətənsevər və cəsarətli insanlar yetişdirib. Bildirdi ki, Nağdalı kəndinin ziyalı ailəsində böyüyən Səma xanım da məhz bu yurdun məğrurluğunu və saflığını öz xarakterində daşıyırdı. 
Milli Məclisinin deputatı, professor Rövşən Muradov burada təkcə bir şəhidin yox, həm də Azərbaycan ziyalısının və Azərbaycan qadınının uca mənəviyyatının yad edildiyini dedi. Millət vəkili 90-cı illərin əvvəllərində respublikada baş verən siyasi mübarizədən, torpaqlarımızın işğalından, Ulu Öndər Heydər Əliyevin və ölkə Prezidenti İlham Əliyevin şəhid ailələrinə, qazi və veteranlara göstərdikləri diqqət və qayğıdan danışdı. O, Ali Baş Komandan İlham Əliyevin misilsiz xidmətlərindən söhbət açdı, ölkəmizdə, Laçın rayonunda gedən quruculuq və abadlıq işləri haqqında ətraflı məlumat verdi. 
 “Laçınsızlar” filminin rejissoru Etibar Məmmədov vurğuladı ki, Laçın ağrısı və həsrəti uzun illər bizim yaradıcılığımızın əsas xəttini təşkil edib. E.Məmmədov çəkilən filmlərin və keçirilən bu möhtəşəm tədbirin bir daha şəhidlərin unudulmazlığını sübut etdiyini diqqətə çatdırdı.
Laçının görkəmli müəllimi və ictimai xadim Leyla İlyasova Səmanın ədəbiyyata və dilimizə olan bağlılığının onun saf qəlbinin göstəricisi olduğunu xatırladı. O nəzərə çatdırdı ki, şəhid müəllimənin ruhunun işığı gələcək şagirdlərin və gənc müəllimlərin yolunu hər zaman aydınlatmağa davam edəcəkdir.
Tədbirdə şəhid Səma Kərimovanın sevdiyi şeirlər və mahnılar səsləndirildi. 
Şəhid Səma Kərimovanın anası Sevda xanım Kərimova tədbir iştirakçılarına və tədbirin təşkilatçılarına dərin təşəkkürünü bildirdi. O, qızının xatirəsinə göstərilən bu böyük ehtirama və diqqətə görə hər kəsə minnətdar olduğunu vurğuladı. Sevda xanım qeyd etdi ki, şəhidlərimizin adının uca tutulması və onların xatirəsinin gələcək nəsillərə ötürülməsi hər birimizin mənəvi borcudur. Bu cür tədbirlərin təşkil olunmasının şəhid ailələri üçün böyük bir təsəlli və mənəvi dəstək olduğunu diqqətə çatdırdı.
Şəhidin qızı Nurlanə Hümbətova öz çıxışında anasının şərəfli ömür yolundan qürurla bəhs etdi. O, belə qəhrəman və fədakar bir qadının qanını daşıdığı üçün sonsuz fəxr hissi keçirdiyini qeyd etdi. 
Tədbirin bədii hissəsində Tatar icmasının fəalı, Dünya Xalqları Assambleyasının dəstəyi ilə keçirilən “Dünya mələklərin səsləri” ədəbi müsabiqənin qalibi Renat İlyazov, Yapon poeziyası müsabiqəsinin qalibi Natəvan San (Məcidova), “Bakı piano festivalı” ədəbi müsabiqənin laureatı Arzu Manaflı, qiraətçi Arzu Məmmədova, İ.Əbilov adına Mədəniyyət Mərkəzinin nəzdində Xalq Teatrının rejissoru, bədii qiraətçi Pərvin Ərzənalıyeva, şəhid Səma Kərimovanın bacısı Səbirə Kərimova, bacısı oğlu, M.Ş.Vazeh adına Mərkəzi Kitabxananın fəal oxucusu Aydın Əlizadə, şəhidimiz Səma Kərimovanın adını daşıyan nəvəsi, məktəbli Səma Hümbətli vətənpərvərlik mövzusunda şeirlər söylədilər.
Əməkdar artist, M.Ş.Vazeh adına Mərkəzi Kitabxananın Fəxri oxucusu Rəhilə Bəndəliyeva “El yolunda”, “Qazilər” və “Yaşa, mənim xalqım”, Respublika və Beynəlxalq müsabiqələr laureatı, M.Ş.Vazeh adına Mərkəzi Kitabxananın Fəxri oxucusu, xanəndə Maya Cəbrayılova “Naçar gedər”, “Ay Laçın”, İ.Əbilov adına Mədəniyyət Mərkəzinin solistləri Fərid Əzizli “Vətən yaxşıdır”, Xəqani Zeynalabdinov “Sarı bülbül” mahnılarını ifa etdilər. Müğənniləri tarda Rəsul Hacızadə, kamançada Eltac Gözəlov, nağarada Həsən Hacıbalayev müşayiət etdilər.
Tədbir iştirakçıları M.Ş.Vazeh adına Mərkəzi Kitabxananın hazırladığı şəhid Səma Kərimovanın xatirəsinə həsr olunmuş videoçarxı izlədilər.
Xatirə gecəsində şəhid ailələri, qazi və veteranlar, şair və yazıçılar, ziyalılar, sənət adamları, mədəniyyət işçiləri, M.Ş.Vazeh adına Mərkəzi Kitabxananın fəal və Fəxri oxucuları, şagird və müəllimlər, geniş ictimaiyyət və KİV nümayəndələri iştirak etdilər.

Videoçarx kitabxananın YouTube kanalında aşağıdakı keçiddə yerləşdirilib:

//youtu.be/pDWQ5yfRNRQ