“Azərbaycan Trüfel İstehsalçılarının İnkişafına Dəstək” İctimai Birliyi iyunun 1-dən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Regionlarda trüfel istehsalının təşviqi” layihəsinin icrasına start verib. Bu haqda saytımıza “Azərbaycan Trüfel İstehsalçılarının İnkişafına Dəstək” İctimai Birliyinin sədri Lalə Həmidova məlumat verib.

 Layihənin əsas məqsədi yüksək iqtisadi səmərəliliyə və ixrac potensialına malik olan trüfel göbələyinin yetişdirilməsi texnologiyaları barədə regionlardakı potensial sahibkarları, fermerləri və torpaq mülkiyyətçilərini məlumatlandırmaq, bu sahədə yeni biznes imkanları yaratmaqdır.

 Layihə çərçivəsində Şəki, Quba, Qəbələ, Lənkəran rayonlarında aqrar sahəyə marağı olan maraqlı tərəflər, mövcud fermerlər və sahibkarlıq fəaliyyətinə başlamaq istəyən şəxslər üçün xüsusi təlim proqramının keçirilməsi planlaşdırılır. Hər rayon üzrə təlimdə 40 nəfər yerli iştirakçının cəlb olunması və onlara trüfel istehsalının aqrotexniki qaydaları, investisiya cəlbediciliyi və satış bazarları barədə peşəkar məlumatların verilməsi nəzərdə tutulub.