Dəyərlərini itirən cəmiyyətlər əvvəlcə gülür, sonra peşman olur. Bir milləti savaş meydanda məğlub edə bilməyənlər bəzən onun dəyərlərini zəiflətməyə çalışırlar. Bu gün qarşımızda başqa bir savaş var. Adına “müasirlik”, “əyləncə”, “trend” deyilən hər şey həqiqətən inkişafdır? Gəncliyin düşüncəsini, ailə anlayışını, qadına və kişiyə olan hörməti ucuz reytinqə, asan qazanca və məsuliyyətsiz məşhurluğa qurban vermək hansı gələcəyi hazırlayır? Ən böyük məğlubiyyət insanın öz dəyərlərinə yadlaşmasıdır. Ən ağır vəziyyət odur ki, insan dəyərini itirəndə bunu itki kimi görmür. Hətta bəzən onu uğur, azadlıq və müasirlik kimi qəbul edir. Müasir olmaq keçmişindən utanmaq deyil, milli kimliyini itirmək deyil. Müharibə meydanlarında itirmədiyimiz dəyərləri, bəzən öz əllərimizlə gündəlik həyatın içində itiririk. Bir vaxtlar bizi zəiflətmək istəyənlər tankla, silahla gəlirdi.
Bu gün isə ekranlardan, boş məşhurluqdan, ucuz şöhrətdən və “müasirlik” adı altında təqdim olunan dəyərlərdən gələn təhlükələr daha səssizdir. Ən təhlükəli işğal odur ki, insan işğal olunduğunu hiss etmir. Bir millətin gələcəyi onun binaları ilə yox, gənclərinin düşüncəsi ilə ölçülür. Əgər biz övladlarımıza hörmət, ləyaqət, ailə, elm və zəhmət əvəzinə yalnız görüntünü, şöhrəti və asan qazancı örnək göstəririksə, sabah itirdiklərimizi geri qaytarmaq çox çətin olacaq.
Azərbaycan-Türkiyə qardaşlığından danışırıq. Halbuki dostluq və qardaşlıq yalnız sözlə deyil, davranışla ölçülür. Qardaşlıq yalnız bayraqları yanaşı tutmaq deyil. Qardaşlıq yalnız siyasətdə, bayraqlarda və şüarlarda qalmamalıdır. Qardaşlıq bir-birinin dəyərlərinə hörmət etməkdir. Qarşı tərəfin cəmiyyətini, ailəsini və mənəviyyatını ucuz qazanc vasitəsinə çevirmək qardaşlıq deyil. 
Bir tərəfdən “qardaşıq” deyib, digər tərəfdən bir cəmiyyətin qadınlarını, gənclərini və zəif nöqtələrini qazanc vasitəsi kimi görmək nə dostluğa, nə də qardaşlığa yaraşır.
Ucuz şöhrət, sürətli qazanc və bir neçə günlük məşhurluq naminə cəmiyyətlərin mənəviyyatını zədələmək heç kimə uzunmüddətli xoşbəxtlik gətirməyib.

Gənclərin Töhfəsi İctimai Birliyinin sədri Asim Vəliyev