Kəlbəcərin məşhur "İstisu" mənbəyi illərdir özünəməxsus mineral tərkibi və təbii xüsusiyyətləri ilə seçilir. Bəs "İstisu"nu gündəlik qidalanmamızda necə dəyərləndirməliyik? Təbii mineral suyun orqanizm üçün hansı üstünlükləri var? Mövzu ilə bağlı sağlam qidalanma üzrə mütəxəssis Məhsəti Hüseynova ilə danışdıq.

– Məhsəti xanım, "İstisu"nu digər içməli sulardan fərqləndirən əsas xüsusiyyət nədir?

– "İstisu"nun əsas üstünlüyü onun təbii mineral su olmasıdır. Kəlbəcərin təbii mənbəyindən gələn bu su mineral tərkibi ilə seçilir. Tərkibində kalsium, maqnezium və digər mineral elementlərin olması İstisunu adi içməli sulardan fərqləndirən əsas xüsusiyyətlərdəndir.

– "İstisu"nu gündəlik içmək olarmı?

– Əlbəttə. Sağlam insan üçün "İstisu"nu gündəlik maye qəbulunun bir hissəsi kimi içmək mümkündür. Xüsusilə isti havalarda kifayət qədər maye qəbul etmək çox vacibdir. Mineral su isə həm su ehtiyacının qarşılanmasına, həm də rasiona müəyyən mineral maddələrin daxil olmasına töhfə verə bilər.

Burada əsas məsələ balansdır. "İstisu"nu gündəlik içməkdən çəkinmək lazım deyil, sadəcə ümumi su qəbulunda müxtəlifliyi və fərdi ehtiyacları nəzərə almaq lazımdır.

– "İstisu"nun faydasını daha çox hansı xüsusiyyəti ilə əlaqələndirərdiniz?

– İlk növbədə təbii mineral tərkibi ilə. Məsələn, maqnezium və kalsium orqanizmdə normal əzələ, sinir və sümük funksiyalarında mühüm rol oynayan minerallardır. Buna görə mineral tərkibli su sağlam və balanslı qidalanmanın tamamlayıcı hissəsi ola bilər.

– Bəs “mineral suyu hər gün içmək olmaz” fikri nə dərəcədə doğrudur?

– Bu fikri ümumiləşdirmək düzgün deyil. Mineral suların tərkibi bir-birindən fərqlənir. Əsas məsələ konkret suyun mineral tərkibinə və insanın fərdi vəziyyətinə baxmaqdır. Sağlam insan üçün uyğun mineral tərkibli suyun gündəlik rasionda olması normaldır.

Təbii ki, müəyyən böyrək, ürək-damar və digər xroniki xəstəlikləri olan insanlar su seçimini həkim tövsiyəsinə uyğun etməlidirlər.

– "İstisu"nu seçərkən istehlakçı nəyə diqqət etməlidir?

– Məhsulun etibarlı mənbədən alınması, qablaşdırmanın bütövlüyü, son istifadə müddəti və saxlanma şəraiti vacibdir. Həmçinin etiketdə göstərilən mineral tərkibə diqqət etmək faydalıdır.

– "İstisu" haqqında fikrinizi bir cümlə ilə necə ifadə edərdiniz?

– "İstisu" bizim təbii sərvətlərimizdən biridir. Onu sadəcə susuzluğu yatıran su kimi deyil, təbii mineral tərkibə malik, gündəlik qidalanmada özünəməxsus yeri olan bir içki kimi dəyərləndirmək lazımdır. Sağlam insan üçün balanslı miqdarda İstisunun gündəlik rasionda yer alması mümkündür.

Əkbər