20 avqust 2022-ci ildə Azərbaycanda cüdonun 50 illiyi münasibətilə keçirilən tədbirlər çərçivəsində Zaqatala şəhərində cüdo üzrə ustad dərsi keçirilib. Azərbaycan Cüdo Federasiyasının (ACF) və Zaqatala rayonu Gənclər və İdman İdarəsinin birgə təşkil etdiyi tədbirdə Zaqataladan olan cüdoçularla yanaşı Şəki, Qəbələ, Qax, Balakən rayonlarından gələn idmançılar da iştirak edib. 

Böyük marağa səbəb olan tədbiri giriş sözü ilə açan ACF Prezidentinin müşaviri Natiq Bağırov bildirib ki, Azərbaycanda cüdonun kütləviləşdirilməsi ilə gənc nəslin fiziki və mənəvi sağlamlığına töhfə vermək Federasiyanın əsas məqsədlərindən biridir. Eyni zamanda N.Bağırov Azərbaycanda cüdonun inkişafına xüsusi diqqət yetirildiyini qeyd edib və bölgələrdə, o cümlədən Zaqatala rayonunda ACF tərəfindən cüdo idman növü üzrə maddi-texniki bazanın inkişaf etdirilməsi ilə bağlı planlaşdırılan işlər barədə də məlumat verib. 

Daha sonra ustad dərsi çərçivəsində ACF Prezidentinin müşaviri, dünya mükafatçısı Natiq Bağırov və V İslam Həmrəyliyi Oyunlarının komanda yarışlarının qızıl medalçısı İbrahim Əliyev müxtəlif cüdo fəndlərinin yerinə yetirilməsini yeniyetmə və gənc cüdoçulara, həmçinin Zaqatala şəhərinin sakinlərinə nümayiş etdiriblər. Onlar cüdonun fəlsəfəsi, mahiyyəti və kəmər bağlamaq qaydaları haqqında ustad dərsi iştirakçılarına geniş məlumat veriblər. Cüdo fəndlərinin göstərilməsində Zaqataladan olan cüdoçularla yanaşı ətraf rayonlardan gələn idmançılar da iştirak edib. Bu praktik cüdo fəndlərinə maraq göstərən Zaqatala sakinləri, uşaqlar və yeniyetmələr tatamiyə dəvət ediliblər və onlar müxtəlif fəndləri yerinə yetirməyə çalışıblar.

Tədbir zamanı iştirakçılar üçün viktorinalar təşkil olunub, cüdo idman növü üzrə müxtəlif suallar verilib və düzgün cavab verən şəxslərə hədiyyələr təqdim olunub. 

Xatırladaq ki, bundan öncə Azərbaycan Cüdo Federasiyası ölkəmizdə cüdonun 50 illiyi ilə bağlı keçirilən tədbirlər çərçivəsində Gəncə şəhərində də ustad dərsi təşkil etmiş və yaxın gələcəkdə ölkəmizin digər şəhər və regionlarında da analoji tədbirlərin həyata keçirilməsini planlaşdırır.

ACF tədbirin təşkilində göstərilən dəstəyə görə Zaqatala rayon İcra Hakimiyyətinə və şəxsən İcra Hakimiyyətinin başçısı Mübariz Əhmədzadəyə, Zaqatala rayon Gənclər və İdman İdarəsinə və şəxsən idarə rəisi Araz Əliyevə öz təşəkkürünü bildirir.