ACI EUROPE, Amadeus, Beynəlxalq Hava Nəqliyyatı Assosiasiyası (IATA), IDEMIA Public Security və SITA səyahət zamanı biometrik texnologiyalardan məsuliyyətli istifadəni təşviq etmək məqsədilə koalisiya yaradıblar.

Oktyabrın 1-də Fransanın Kurbevua şəhərində elan edilən təşəbbüs Avropa İttifaqında (Aİ) biometrik məlumatlardan könüllü və təhlükəsiz istifadəyə imkan verən, eyni zamanda sərnişinlərin seçim azadlığını, şəxsi məlumatlarını və fundamental hüquqlarını qoruyan tənzimləmə yanaşmasının formalaşdırılmasına yönəlib.

Koalisiya Aİ-nin qərarverici qurumlarını rəqəmsal qanunvericiliyin sadələşdirilməsini nəzərdə tutan “Digital Omnibus” qanunvericilik paketində bu prinsipləri nəzərə almağa çağırıb.

Paketin məqsədi Avropanın rəqəmsal sahədəki qaydalarını sadələşdirmək, innovasiyaları və rəqabət qabiliyyətini dəstəkləmək, məlumatların qorunması və kibertəhlükəsizlik üzrə yüksək standartları saxlamaqdır. Bununla belə, koalisiyanın mövqeyinə görə, təklif olunan müddəalar sərnişinlərin biometrik texnologiyalardan könüllü istifadəsini istəmədən məhdudlaşdıra bilər.

Hava limanlarında sərnişin axınının idarə olunması

Koalisiyanın açıqlamasında bildirilir ki, biometrik yoxlama sənədlərin əməkdaşlar tərəfindən təkrar yoxlanılmasına ehtiyacı azalda, sərnişinlərin nəzarət məntəqələrindən keçidini sürətləndirə və hava limanlarının mövcud terminal infrastrukturundan daha səmərəli istifadəsinə imkan yarada bilər.

Bu texnologiyalar sərnişin sıxlığının artdığı dövrlərdə axının idarə olunmasını asanlaşdıra, əməkdaşların isə köməyə və əlavə diqqətə ehtiyacı olan sərnişinlərə daha çox vaxt ayırmasına şərait yarada bilər.

Koalisiya üzvləri hesab edirlər ki, aydın tənzimləmə çərçivəsi bu sahəyə investisiyaları təşviq etməklə yanaşı, Avropa texnologiya şirkətlərinin etibarlı həllər hazırlamasına və onları öz bazarlarında daha geniş tətbiq etməsinə dəstək verə bilər.

Bu məqsədlə koalisiya konkret texnologiyaya üstünlük verməyən, müvafiq qoruyucu tədbirlər çərçivəsində biometrik məlumatlardan könüllü istifadəyə imkan yaradan qaydaların qəbulunu təklif edir. Eyni zamanda sərnişinlərə biometrik məlumatların istifadəsini tələb etməyən alternativlər təqdim olunmalıdır.

Könüllü iştirak və şəxsi məlumatların qorunması

Koalisiyanın mövqeyinə əsasən, biometrik həllərdən istifadə könüllü və təhlükəsiz olmalı, yalnız konkret səfərlə məhdudlaşmalıdır. Sərnişinlər məlumatlarını paylaşıb-paylaşmamaq barədə sərbəst qərar verməli və istənilən vaxt onların silinməsini tələb edə bilməlidirlər.

Açıqlamada istinad edilən IATA-nın Qlobal Sərnişin Sorğusuna görə, respondentlərin 74 faizi pasport və ya minik talonunu göstərmək əvəzinə biometrik məlumatlarını paylaşmağa hazır olduqlarını bildiriblər.

Koalisiya “Avropada biometrik texnologiyalardan məsuliyyətli istifadənin təşviqi” adlı manifest də təqdim edib. Sənəddə artan sərnişin axını və hava limanlarının məhdud tutumu fonunda dövlət və özəl sektor arasında dialoqun gücləndirilməsi, həmçinin biometrik məlumatlardan istifadəyə dair hüquqi qaydaların aydınlaşdırılması nəzərdə tutulur.

“Avropa İttifaqının qərarverici qurumlarının Avropanı biometrik texnologiyaların tənzimlənməsi sahəsində qlobal liderə çevirmək imkanı var. Bununla yanaşı, biometrik texnologiyalardan istifadə edilən səfərlər hər zaman sərnişin seçiminə və könüllü iştiraka əsaslanmalıdır”, — koalisiyanın birgə bəyanatında vurğulanır.

Koalisiya səyahət sektorunun müxtəlif iştirakçılarının təcrübəsini birləşdirərək qərarverici və tənzimləyici qurumlarla əməkdaşlıq etməyi planlaşdırır. Təşəbbüs üzvlərinin fikrincə, bu əməkdaşlıq Avropada şəxsi həyatın toxunulmazlığı və fundamental hüquqların qorunması üzrə yüksək standartların saxlanılması ilə yanaşı, səyahət sahəsində innovasiyaların inkişafı üçün də əhəmiyyətlidir.