Bakı Şəhər Mədəniyyət Baş İdarəsi Yasamal rayon Mərkəzləşdirilmiş Kitabxana Sisteminin 2 №-li kitabxana filialı 239 №-li tam orta məktəbdə rus yazıçısı Aleksandr Çakovskinin “Blokada” romanının 50 illik yubileyi münasibətilə əsərin müzakirəsi keçirdi.

Tədbirin əvvəlində Böyük Vətən müharibəsində həlak olanların xatirəsi bir dəqiqəlik sükutla yad edildi.

2 №-li kitabxana filialının müdiri Yəmən Əmirova çıxışında qeyd etdi ki, Aleksandr Çakovskinin “Blokada” adlı əsəri roman-salnamədir və Leninqrad (Sankt-Peterburq) şəhərinin Böyük Vətən müharibəsi illərində müdafiəsinə həsr olunub.

Roman tarixi faktlar, arxiv sənədləri və 900 günlük mühasirənin şahidlərinin dedikləri əsasında yazılıb. O qeyd etdi ki, müəllif Böyük Vətən müharibəsi illərində bir sıra cəbhələrdə hərbi müxbir kimi çalışıb.

Müzakirədə şagirdlər qeyd etdilər ki, Leninqradın mühasirəsi zamanı şəhərin əhalisi misilsiz qəhrəmanlıq və dözüm nümunələri göstərmişdir.

Tədbirdə qeyd olundu ki, roman əsasında dörd filmdən ibarət eyni adlı kino-salnamə çəkilib. Şagirdlərə əsəri mütaliə etmək tövsiyə olundu.