Azərbaycan Respublikasının Qeyri- Hökumət Təşkilatlarına Dövlət Dəstəyi Agentliyinin maliyyə yardımı ilə “C.Cabbarlı adına Mədəniyyət, Elm və Təhsilin İnkişafına Yardım” İctimai Birliyi “Cəfər Cabbarlı – Müasirimizdir” adlı layihəsinin icrasına başlayıb. Layihənin məqsədi milli-mənəvi dəyərlərin inkişafı məqsədi ilə xalqımızın, xüsusilə də gənc nəslin maariflənməsi, Azərbaycanın tanınmış klassik ədəbiyyat xadimlərinin bədii irsinin öyrənilməsi və təbliğidir.
Layihə 3 ay müddətinə, iyun ayının 1-dən avqust ayının 30-a kimi Bakı və Xızı şəhərlərində icra olunacaq.
Layihə çərçivəsində Azərbaycanın zəngin mədəniyyətinin və incəsənətinin öyrənilməsi, milli-mənəvi dəyərlərimizə diqqət və sevginin gücləndirilməsi, mədəniyyətin müxtəlif vacib sahələrinə marağın artırılması, eyni zamanda milli ədəbiyyatımızın yüksək səviyyədə öyrənilməsi, azərbaycançılıq ideyalarının təbliğinin diqqətə alınması, ədəbiyyat xadimlərinin yaradıcılığının öyrənilməsi baxımından bədii ədəbiyyat nümunələrinin nəşri, maarifçilik ideyalarının inkişaf etdirilməsi nəzərdə tutulub.
Layihə çərçivəsüində dahi dramaturq Cəfər Cabbarlının doğulduğu Xızı şəhərinə səyahət, tanınmış elm, mədəniyyət və incəsənət xadimlərinin, Xızı ictimaiyyətinin də iştirakı ilə Xızıda hər il keçirilən ənənəvi “Xızıda Cəfər Cabbarlı günü”nün qeyd olunması, dramaturqun Xızıda fəaliyyət göstərən ev-muzeyinə ekskursiya təşkil edilməsi nəzərdə tutulub. Eyni zamanda ədibin Qərb ədəbiyyatından tərcümə etdiyi bir sıra bədii nümunələrdən ibarət kitabın və filologiya elmləri doktoru, professor Tahirə Məmmədin Cəfər Cabbarlı haqqında yazdığı monoqrafiyanın nəşr olunması və hər iki kitabın geniş ictimaiyyətə təqdimatı nəzərdə tutulub.