Bakı şəhər Yasamal rayon Mərkəzləşdirilmiş Kitabxana Sisteminin (MKS) M.Ş.Vazeh adına Mərkəzi Kitabxanasında Mədəniyyət Konsepsiyasının icrası ilə əlaqədar həyata keçirilən “Kitablar səltənətinin inciləri” adlı mütaliə silsiləsindən izləyicilərə görkəmli pedoqoq, publisist, tərcüməçi, Əməkdar mədəniyyət işçisi, Xalq şairi Mirvarid Dilbazinin “Anam yadıma düşdü” şeiri təqdim olunur.

Azərbaycanın ilk qadın Xalq şairi adına layiq görülmüş el anası Mirvarid Dilbazi yaradıcılığı xalqa, onun həyatında baş verən hadisələrə bağlı idi. Ulu Öndər Heydər Əliyev şairin 70 illik yubileyində demişdir: “Siz 70 ildir ki, xalqımıza, millətimizə, ölkəmizə, Vətənimizə sədaqətlə, öz fədakar əməyinizlə, parlaq yaradıcılığınızla xidmət edirsiniz. Sizin şeirləriniz, poemalarınız, bütün əsərləriniz neçə-neçə nəsillərə güc, inam verib və bu gün də verir, gələcəkdə də verəcəkdir”.

İsti küləklər əsdi,
Yaz gəlməyə tələsdi.
Mənim ürəyim əsdi,
Anam yadıma düşdü...

Bənövşə dəstə-dəstə,
Qızılgül yarpaq üstə.
Sular axır ahəstə,
Anam yadıma düşdü...

Yazıçı Şahzadə İldırım hazırladığı videoçarxda  Xalq şairi Mirvarid Dilbazi haqqında məlumat verir. İzləyicilərə təqdim olunan  “Anam yadıma düşdü” şeirində  təbiətin gözəl ahəngində ananın xatırlanması, anaya olan böyük sevgi və müqəddəs duyğular  tərənnüm olunur. Şeir Azərbaycan poeziyasında ana mövzusunda yazılmış ən təsirli, səmimi və kövrək nümunələrdən biridir. Şair bu əsərdə ana müqəddəsliyini, ona olan sonsuz sevgini və dözülməz ayrılıq həsrətini böyük bir ürək ağrısı ilə qələmə alıb. Müəllif uşaqlıq illərinə, anasının isti nəfəsinə və qayğısına duyduğu ehtiyacı dilə gətirir.

Şairin “Anam yadıma düşdü” şeirinə bəstəkar, Xalq artisti Ramiz Mustafayevin bəstələdiyi mahnı Xalq artisti Gülağa Məmmədovun ifasında izləyicilərə təqdim olunur:

​​​​