“Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi” Publik Hüquqi Şəxsi ilə "Qadin Dünyasi" İctimai Birliyi arasında “01” iyun 2026-cı il tarixində “Regionlarda qadınlarla iş” layihəsinin icrası məqsədilə Qrant müqaviəsi imzalanmışdır.
"Qadin Dünyasi" İctimai Birliyindən saytımıza verilən məlumata görə “Regionlarda qadınlarla iş” layihəsi “Böyük qayıdış” Dövlət Proqramına uyğun olaraq Qarabağa köçürülmüş ailələrin, xüsusilə qadınların yeni yaşayış şəraitinə psixoloji, emosional və sosial baxımdan adaptasiyalarına kömək etmək məqsədi daşıyır. Belə ki, bu insanlar uzun müddət müxtəlif şəhərlərdə, fərqli həyat tərzində yaşamışlar. Yeni salınan müasir yaşayış məntəqələri / qəsəbələr şərait baxımından rahat olsa da, bir çox ailələr yeni həyat tərzinə uyğunlaşmalarına çətinlik, emosional gərginlik və sosial pasivlik yaradır.
Layihə bu problemləri aradan qaldırmaq və köçürülmüş insanların yeni mühitə alışmasını asanlaşdırmağa yönəlmişdir. Layihənin ilkin mərhələsində Xankəndi və ətraf qəsəbələrdən olan 100 nəfər iştirakçı arasında psixoloji testlər keçiriləcək, nəticələrə əsasən onlar adaptasiya səviyyəsinə görə kateqoriyalara bölünərək, qruplar yaradılacaq. Yaradılmış qruplar üçün psixoloji dəsətək və motivasiya sessiyaları təşkil olunacaq. Bu sessiyalar qadınların özünəinamlarını atırmaq, müsbət düşüncə tərzini gücləndirmək və sosial münasibətlərin bərpa olunmasına kömək etmiş olacaqdır.
Növbəti mərhələdə iştirakçılar üçün rəqəmsal bacarıqlar, biznes düşüncə və yeni iş imkanları üzrə təlimlər keçiriləcəkdir. Bu təlimlər nəticəsində onların evdən və ya icma səviyyəsində gəlir gətirən fəaliyyətlər qurmalarına, onlayn platformalarda işləmək bacarıqlarının uinkişaf etdirilməsinə imkan yaranacaqdır.
Layihənin əsas məəqsədi Qarabağda yeni qurulan icmalarda dayanıqlı sosial münasibətlər formalaşdırmaq, rahat psixoloji mühit yaratmaq və birgəyaşayış mədəniyyətini gücləndirməkdən ibarətdir.