“Gənclərin Töhfəsi” İctimai Birliyinin nümayəndə heyətinin Azərbaycan Respublikası Gənclər və İdman Nazirliyinin maliyyə dəstəyi ilə sentyabrın 5-dən 9-dək İsrail Dövlətinə səfəri çərçivəsində bir sıra görüşlər və mədəni-humanitar istiqamətli tədbirlər həyata keçirilib. Səfərin əsas məqsədlərindən biri Azərbaycanla İsrail arasında gənclər, mədəniyyət və ictimai diplomatiya sahələrində əlaqələrin inkişafına töhfə vermək, ölkəmizin tarixi, milli-mədəni irsi və müasir inkişafı barədə məlumatların İsrail ictimaiyyətinə çatdırılması olub.

Səfər çərçivəsində “Gənclərin Töhfəsi” İctimai Birliyi adından İsrailin Or Yehuda şəhərinin meri Liat Şohata da “Gənclərin Töhfəsi” İctimai Birliyi adından təşəkkürnamə və xatirə suveniri təqdim olunub.

Səfərin diqqətçəkən məqamlarından biri isə Or Yehuda şəhər meriyasının kitabxanasına Azərbaycanla bağlı müxtəlif mövzularda nəşrlərin hədiyyə edilməsi olub. Kitabxananın fonduna təqdim edilən nəşrlər arasında Azərbaycan xalqının tarixi və milli-mənəvi dəyərlərini, zəngin mədəni irsini, milli mətbəxini və müasir inkişafını əks etdirən kitablarla yanaşı, Ulu Öndər Heydər Əliyevin siyasi irsinə, Qarabağ Zəfərinə və Xocalı soyqırımına həsr olunmuş nəşrlər də yer alıb. Kitablar əsasən ivrit və ingilis dillərində təqdim edilib. Nəşrlərin kitabxanaya hədiyyə edilməsi Azərbaycanın tarixi və mədəniyyəti haqqında məlumatların İsrail ictimaiyyətinə daha geniş şəkildə çatdırılması, həmçinin iki ölkə arasında mədəni və humanitar əlaqələrin möhkəmləndirilməsi baxımından mühüm addım kimi qiymətləndirilir.

Təqdimat və digər təşkilati məsələlər Or Yehuda şəhərinin merinin müavini Janna Koenin (Jana Cohen) vasitəçiliyi və dəstəyi ilə həyata keçirilib.

Azərbaycan nümayəndə heyəti tərəfindən göstərilən diqqətə görə minnətdarlığını bildirən Liat Şohat təqdim olunan təşəkkürnamə və hədiyyəni yüksək qiymətləndirib. Mer Liat Şohat Azərbaycan və İsrail arasında mövcud dostluq və əməkdaşlıq münasibətləri, xalqlar arasında qarşılıqlı əlaqələrin genişləndirilməsinin əhəmiyyəti, xüsusilə gənclər və mədəniyyət sahəsində birgə təşəbbüslərin həyata keçirilməsinin əhəmiyyətini vurğulayıb.

Mer Liat Şohat kitabların şəhər kitabxanasına hədiyyə edilməsinə görə də təşəkkürünü ifadə edib. O, nəşrlərin Or Yehuda sakinlərinin Azərbaycan haqqında daha ətraflı məlumat əldə etməsinə, ölkələr və xalqlar arasında qarşılıqlı tanıma və mədəni əlaqələrin güclənməsinə imkan yaradacağını qeyd edib.

Liat Şohat Azərbaycan nümayəndə heyətinin səfərini və həyata keçirilən təşəbbüsləri yüksək qiymətləndirərək, bu kimi layihələrin gələcəkdə də davam etdirilməsinin vacibliyini vurğulayıb. Onun sözlərinə görə, qarşılıqlı səfərlərin, gənclər arasında əlaqələrin, mədəni tədbirlərin və kitabxanalararası əməkdaşlığın genişləndirilməsi Azərbaycan və Or Yehuda arasında mövcud münasibətlərin daha da inkişafına xidmət edə bilər.

Or Yehuda şəhərinin meri gələcəkdə Azərbaycanla bağlı mədəni təqdimatların, gənclər üçün birgə layihələrin, qarşılıqlı səfərlərin və müxtəlif ictimai təşəbbüslərin keçirilməsi istiqamətində əməkdaşlığın davam etdirilməsində maraqlı olduqlarını bildirib.

“Gənclərin Töhfəsi” İctimai Birliyinin nümayəndələri bildiriblər ki, bu cür təşəbbüslər yalnız mədəniyyətlərin tanıdılması baxımından deyil, eyni zamanda insanlar və gənclər arasında qarşılıqlı anlaşma və əlaqələrin gücləndirilməsi baxımından da əhəmiyyət daşıyır.

Səfər çərçivəsində həyata keçirilən görüş və tədbirlər Azərbaycanın milli-mədəni irsinin, tarixinin və müasir reallıqlarının beynəlxalq platformalarda tanıdılması istiqamətində ictimai təşəbbüslərin davam etdirilməsinə xidmət edib.

Səfərin yekunları göstərir ki, Azərbaycan və İsrail arasında mövcud münasibətlərin ictimai və mədəni müstəvidə inkişaf etdirilməsi üçün gənclər təşkilatlarının, yerli icmaların və mədəniyyət müəssisələrinin iştirakı ilə yeni layihələrin həyata keçirilməsi üçün imkanlar mövcuddur.

Qeyd edək ki, “Gənclərin Töhfəsi” İctimai Birliyinin nümayəndələrinin İsrailə səfəri Azərbaycan Respublikası Gənclər və İdman Nazirliyinin maliyyə dəstəyi ilə təşkil olunub.