Prezident İlham Əliyev: “Bu gün ölkəmizdə bərpaolunan enerji növlərinin yaradılması əsasən xarici investorlar tərəfindən icra olunan genişmiqyaslı layihələr çərçivəsində reallaşdırılır”

 Son illər ərzində Azərbaycanda enerji sektorunda aparılan islahatlar və həyata keçirilən iri layihələr ölkəmizin texnoloji və institusional potensialını açıq şəkildə nümayiş etdirir. Bu gün keçirilən açılış mərasimləri və tədbirlər təkcə yeni enerji obyektlərinin istismara verilməsi ilə məhdudlaşmır. Eyni zamanda, bu tədbirlər görülmüş işlərə bir növ yekun vurmaqla yanaşı, gələcək planların və strateji baxışların ictimaiyyətlə bölüşdürülməsi baxımından da mühüm əhəmiyyət daşıyır. Azərbaycanın yaşıl enerji sahəsində qarşıya qoyduğu məqsədlər aydındır: enerji təhlükəsizliyini möhkəmləndirmək, ekoloji dayanıqlılığı təmin etmək və ölkəni regional enerji mərkəzinə çevirmək. Prezident İlham Əliyevin 8 yanvar 2026-cı ildə “Xızı-Abşeron” Külək Elektrik Stansiyasının rəsmi açılış mərasimində vurğuladığı kimi, yeni generasiya güclərinin istismara verilməsi həm olduqca mürəkkəb, həm də yüksək məsuliyyət tələb edən bir prosesdir. Bu sahədə əldə olunan uğurlar Azərbaycan energetikasının müasir çağırışlara cavab vermək iqtidarında olduğunu sübut edir.

 Yeni elektrik stansiyalarının, xüsusilə də bərpaolunan enerji obyektlərinin istismara verilməsi təkcə tikinti ilə məhdudlaşmır. Bu proses planlaşdırmadan layihələndirməyə, şəbəkəyə inteqrasiyadan idarəetməyə qədər çoxşaxəli və kompleks mərhələləri əhatə edir. Böyük həcmdə bərpaolunan enerji mənbələrinin ümumi enerji sisteminə inteqrasiyası isə xüsusi peşəkarlıq, müasir texnologiyalar və ciddi maliyyə vəsaiti tələb edir. Prezident İlham Əliyev qeyd etdi ki, məhz bu amillər ölkəmizdə enerji sektorunda çalışan mütəxəssislərin üzərinə böyük məsuliyyət qoyur və onların bilik, bacarıq və təcrübəsi bu prosesin uğurla həyata keçirilməsində həlledici rol oynayır. Bu kontekstdə dövlət başçısı “Xızı-Abşeron” Külək Elektrik Stansiyasının tikintisində baş podratçı kimi iştirak edən “Power China” şirkətinin fəaliyyətini xüsusi olaraq qeyd etdi. Dünyanın aparıcı enerji və infrastruktur şirkətlərindən biri olan “Power China” bu layihədə podratçı kimi iştirak etsə də, gələcək mərhələlərdə Azərbaycanda investor qismində də fəaliyyət göstərməyi planlaşdırır.

Bərpaolunan enerji mənbələrinin böyük həcmdə enerji sisteminə inteqrasiyası enerji təhlükəsizliyi ilə yanaşı, sistemin sabitliyinin qorunmasını da tələb edir. Bu isə yalnız güclü kadr potensialı və müasir idarəetmə mexanizmləri hesabına mümkündür. Prezident İlham Əliyev vurğuladı ki, qarşıdakı illərdə bərpaolunan enerji stansiyalarının tikintisi daha da geniş vüsət alacaq və bu baxımdan Azərbaycan energetiklərinin fəaliyyətinin daim yüksək səviyyədə olması strateji əhəmiyyət daşıyır.

 Bu gün Azərbaycan enerji sektorunda uğurlu beynəlxalq əməkdaşlıq nümunəsi formalaşdırmışdır. Xarici şirkətlərin qabaqcıl texnologiyalar, investisiya və təcrübə ilə ölkəmizə cəlb olunması enerji sektorunun dayanıqlı inkişafını təmin edir. Eyni zamanda Prezident İlham Əliyev qeyd etdi ki, bundan sonra bərpaolunan enerji növlərinin yaradılması sahəsində daha çox xarici investorlar fəal olacaq. Bununla yanaşı, sevindirici haldır ki, Azərbaycan şirkətləri də bu sahəyə maraq göstərməyə başlamış, artıq bir neçə Günəş Elektrik Stansiyasının tikintisinə start verilmişdir. Bu, yerli biznesin və milli kapitalın yaşıl enerji sektoruna inteqrasiyasının başlanğıcı kimi dəyərləndirilə bilər.

 Son illərdə Azərbaycanda bərpaolunan enerji sahəsində həyata keçirilən layihələr öz miqyası, texnoloji səviyyəsi və investisiya həcmi ilə seçilir. Prezident İlham Əliyevin vurğuladığı kimi, bu gün ölkəmizdə bərpaolunan enerji növlərinin yaradılması əsasən xarici investorlar tərəfindən icra olunan genişmiqyaslı layihələr çərçivəsində reallaşdırılır. Bu layihələrə artıq yüz milyonlarla dollar həcmində investisiya yatırılmışdır ki, bu da Azərbaycanın beynəlxalq enerji bazarında artan nüfuzunun və etibarlı tərəfdaş kimi tanınmasının bariz göstəricisidir. Prezident İlham Əliyev çıxışında xüsusi olaraq vurğuladı ki, Azərbaycan dövləti xarici sərmayələri daim qoruyur. Ölkəmizdə imzalanmış çoxsaylı neft kontraktları artıq onilliklərdir ki, uğurla icra olunur və bu müddət ərzində qəbul edilmiş qərarlarda, kontraktlarda nəinki maddə, hətta bir söz belə dəyişdirilməmişdir və dəyişdirilməyəcəkdir. Bu prinsipial mövqe xarici investorlar üçün son dərəcə vacib amildir. Çünki investisiya üçün əsas şərtlərdən biri hüquqi sabitlik və dövlətin verdiyi sözə sadiqliyidir. Azərbaycan bu baxımdan beynəlxalq aləmdə etibarlı və proqnozlaşdırıla bilən tərəfdaş kimi tanınır. “Sözümüz imzamız qədər dəyərlidir” prinsipi ölkənin investisiya siyasətinin əsasını təşkil edir.

Bütövlükdə energetika sahəsində gedən proseslərə nəzər saldıqda aydın olur ki, bu gün enerji təhlükəsizliyi məsələləri qlobal miqyasda daha qabarıq şəkildə ön plana çıxır. Azərbaycan isə uzun illərdir bu istiqamətdə ardıcıl və məqsədyönlü fəaliyyət göstərir. Neft və qaz ixracı, neft məhsullarının, elektrik enerjisinin, neft-kimya məhsullarının və mineral gübrələrin ixracı bu gün bir çox ölkələr üçün enerji və sənaye təhlükəsizliyinin təmin olunmasında mühüm rol oynayır. Azərbaycan bu sahələrdə təkcə təchizatçı deyil, eyni zamanda məsuliyyətli və etibarlı tərəfdaş kimi çıxış edir.

 Enerji sahəsində aparılan uğurlu siyasət nəticəsində Azərbaycan dünya miqyasında müsbət imic qazanmışdır. Ölkəmiz beynəlxalq bazarlarda öhdəliklərinə sadiq, tərəfdaşlarının maraqlarını nəzərə alan və uzunmüddətli əməkdaşlığa üstünlük verən dövlət kimi tanınır. Bərpaolunan enerji layihələrinin həyata keçirilməsi bu imici daha da gücləndirir. Çünki yaşıl enerji təkcə iqtisadi deyil, həm də ekoloji məsuliyyət deməkdir. Azərbaycanın bu istiqamətdə atdığı addımlar ölkənin qlobal iqlim gündəliyinə verdiyi töhfəni və gələcəyə hesablanmış inkişaf modelini nümayiş etdirir.

Bu gün görülən işlər və əldə edilən nəticələr göstərir ki, Azərbaycan həm ənənəvi, həm də bərpaolunan enerji sahələrində balanslaşdırılmış və uzaqgörən siyasət yürüdür. Xarici investorlar üçün yaradılan əlverişli mühit, hüquqi sabitlik, güclü infrastruktur və strateji coğrafi mövqe ölkəmizi enerji sahəsində cəlbedici investisiya mərkəzinə çevirir. Bütün bu proseslər göstərir ki, Azərbaycan enerji sektorunda həm texnoloji modernləşmə, həm də institusional inkişaf paralel şəkildə həyata keçirilir. Yeni generasiya güclərinin istismara verilməsi, beynəlxalq tərəfdaşlıq, yerli mütəxəssislərin peşəkarlığı və investorlar üçün yaradılan əlverişli mühit ölkənin enerji strategiyasının əsas sütunlarını təşkil edir. Prezident İlham Əliyevin rəhbərliyi ilə həyata keçirilən bu siyasət nəticəsində Azərbaycan yaxın illərdə regionda ən etibarlı və qabaqcıl enerji istehsalçılarından biri kimi mövqeyini daha da möhkəmləndirəcək və bərpaolunan enerji sahəsində nümunəvi inkişaf modeli təqdim edəcək.

Nurullayeva Zenfira İslam qızı

Qara Qarayev adına Mərkəzi İncəsənət Məktəbinin xor  ixtisası üzrə müəllimi, Azərbaycan Respublikasının Əməkdar müəllimi