Bakıda Gənclərin Töhfəsi İctimai Birliyinin (GTİB) fəaliyyətinin 15 illiyinə həsr olunmuş yubiley tədbiri keçirilib. Tədbirdə dövlət qurumlarının nümayəndələri, millət vəkilləri, qeyri-hökumət təşkilatlarının rəhbərləri, ictimai fəallar, media təmsilçiləri və könüllü gənclər iştirak ediblər.
Xeber7.az xəbər verir ki, yubiley mərasimində Gənclərin Töhfəsi İctimai Birliyinin sədri Asim Vəliyev və birliyin icraçı direktoru, Qida Təhlükəsizliyi Hərəkatının həmtəsiçisi və sədri Məhsəti Hüseynova ötən 15 il ərzində gənclər siyasəti, vətəndaş cəmiyyətinin inkişafı, sağlam həyat tərzinin təşviqi, ictimai diplomatiya və sosial təşəbbüslər sahəsində həyata keçirdiyi layihələrə dair geniş təqdimat edib. Qeyd olunub ki, Birlik bu müddət ərzində minlərlə gəncin maariflənməsinə, ictimai fəallığının artırılmasına və sosial təşəbbüslərdə iştirakına töhfə verib.
Tədbirdə çıxış edən rəsmi qonaqlar millət vəkilləri Ceyhun Məmmədov, Vüqar İskəndərov, Peşə Təhsili Agentliyi mətbuat katibi Aytən Səfərəliyeva, MDB Parlamentlərarası Assambleyasının Demokratiyanın inkişafının monitorinqi beynəlxalq institutunun Bakı filialının direktoru Kamil Əliyev, Sənaye və İnnovasiyalar üzrə Bakı Dövlət Peşə Təhsili Mərkəzinin İctimaiyyətlə əlaqələr üzrə mütəxəssisi Vəfa Mollayeva, “Demokratik Azərbaycan Naminə” Gənclər İctimai Birliyinin sədri Elməddin Behbud, “Diaspor Fəaliyyətinə Jurnalistlərin Dəstəyi” İctimai Birliyinin sədri Fuad Hüseynzadə, “Peşəkar Qənnadçılar” İctimai Birliyinin Eynur Nağdəliyev, Gənclər Hərəkatının aparıcı simalarından Nihat Allahyarlı, Xüsusi Təyinatlıların Şəhid Ailələri, Qazilər və Veteranları İctimai Birliyinin sədri, qazi Bəhruz Məmmədzadə GTİB-in uzunmüddətli və ardıcıl fəaliyyətini yüksək qiymətləndirərək, təşkilatın gənclərlə iş sahəsində nümunəvi təşəbbüslər həyata keçirdiyini vurğulayıblar. Bildirilib ki, Gənclərin Töhfəsi İctimai Birliyi dövlət gənclər siyasətinin icrasında etibarlı tərəfdaşlardan biri kimi tanınır.
Yubiley mərasimi çərçivəsində dövlət qurumlarının nümayəndələri, millət vəkilləri, ictimai xadimlər, QHT rəhbərləri, tərəfdaş təşkilatlar və fəal könüllülər təşəkkürnamə və plaketlərlə təltif olunublar. Rus əsilli Azərbaycan Milli Qəhrəmanı Yuri Kovalyovun qızı Regina Kovalyova, II Qarabağ müharibəsinin qaziləri Denis Quzlayev, Zorin Pavel, “Yeniçağ.az” Media Qrupu, “TİPİK.az” gənclər platforması, İnşaat Kollecinin THİK sədri Əbülfəz Cavadov, Diplomatiya Akademiyasının təsisçisi Fəxrəddin Abdullayev, 1 saylı baza Tibb Kollecinin əməkdaşı Elnur Həsənbəyli, Azərbayacn Respublikası Prezidenti yanında Dövlət İdarəçilik Akademiyasının baş mütəxsisi Murad Həsənxanlı, GTİB sədr müavini Şahin Əliyev, idarə heyətinin üzvləri Xəqan Qədimov, Mirsirac Siraclı, birliyin fəaliyyətində aktiv gənclər Yubiley mərasimi çərçivəsində təşəkkürnamə və plaketlərlə təltif olunanlar arasındadır. Bu addım GTİB-in fəaliyyətinə göstərilən dəstəyin və birgə əməkdaşlığın rəmzi kimi dəyərləndirilib.
Tədbirin sonunda “Gənclərin Töhfəsi” İctimai Birliyinin rəhbərliyi tərəfindən gələcək dövr üçün strateji hədəflər, yeni layihə və təşəbbüslər barədə məlumat verilib, gənclərlə iş sahəsində fəaliyyətin daha da genişləndirilməsinin prioritet olduğu bildirilib.
Qeyd edək ki, “Gənclərin Töhfəsi” İctimai Birliyi 2009-cu ildən etibarən Azərbaycanda gənclərin sosial, intellektual və vətəndaş cəmiyyəti sahəsində inkişafına yönəlmiş çoxsaylı layihələr həyata keçirir.