Şəki şəhərində Şəki Dövlət Aqrar İnkişaf Mərkəzində (DAİM) “Azərbaycanda trüfel istehsalının təşviqi” layihəsi çərçivəsində növbəti maarifləndirici tədbir keçirilib.

Layihə “Azərbaycan Trüfel İstehsalçılarının İnkişafına Dəstək” İctimai Birliyi tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilir.

Tədbirdə Şəki, Qax, Zaqatala və Balakən rayonlarından fermerlər, sahibkarlar, turizm agentliklərinin nümayəndələri, aqrar sahə üzrə mütəxəssislər və trüfel istehsalına maraq göstərən vətəndaşlar iştirak ediblər.

İctimai Birliyin sədri Lalə Həmidova çıxış edərək bildirib ki, layihənin əsas məqsədi Azərbaycanda trüfel istehsalının inkişaf etdirilməsi, bu sahə üzrə elmi biliklərin və beynəlxalq təcrübənin fermerlərə çatdırılması, kənd təsərrüfatında innovativ yanaşmaların tətbiqinin təşviq olunması, həmçinin trüfel istehsalının ölkənin aqrar və qeyri-neft sektorunun perspektivli istiqamətlərindən birinə çevrilməsinə dəstək verməkdir.

Çıxış zamanı qeyd olunub ki, Şəki-Zaqatala iqtisadi rayonu zəngin meşə ehtiyatları, geniş fındıq bağları, əlverişli torpaq-iqlim şəraiti və biomüxtəlifliyi ilə Azərbaycanda trüfel istehsalının inkişafı üçün ən perspektivli bölgələrdən biri hesab olunur. Bölgədə palıd, fındıq, vələs, Şərq fıstığı (buk), cökə, qovaq və söyüd kimi trüfel göbələklərinin mikoriza əlaqəsi yarada bildiyi ağac növlərinin geniş yayılması gələcəkdə bu sahənin inkişafı üçün əlverişli imkanlar yaradır.

Tədbirdə bildirilib ki, trüfel göbələkləri bu ağacların kök sistemi ilə mikoriza əlaqəsi yaradaraq təbii simbioz formalaşdırır. Bu proses ağacların su və qida maddələrini daha səmərəli mənimsəməsinə, kök sisteminin inkişafına və torpağın bioloji aktivliyinin artmasına müsbət təsir göstərir.

Vurğulanıb ki, Şəki-Zaqatala bölgəsinin əsas kənd təsərrüfatı sahələrindən olan fındıqçılıqda trüfel mikorizasının tətbiqi məhsuldarlığın artırılması, məhsulun keyfiyyət göstəricilərinin yaxşılaşdırılması, mineral maddələrin daha səmərəli mənimsənilməsinin dəstəklənməsi və bağların uzunömürlülüyünün artırılması baxımından perspektivli istiqamətlərdən biridir. Düzgün aqrotexniki yanaşma və uyğun torpaq şəraitində mikoriza torpağın münbitliyinin qorunmasına və sağlam bağların formalaşmasına da töhfə verə bilər.

Tədbirdə trüfel göbələklərinin ekoloji əhəmiyyəti də xüsusi diqqətə çatdırılıb. Bildirilib ki, torpaq altında formalaşan trüfel miseli torpağın strukturunu möhkəmləndirir, suyun torpağa hopmasını yaxşılaşdırır, rütubətin daha uzun müddət saxlanmasına şərait yaradır və torpaq eroziyasının azalmasına töhfə verir. Bu xüsusiyyətlər iqlim dəyişiklikləri şəraitində torpaq və su ehtiyatlarından daha səmərəli istifadə olunmasına, quraqlıq dövrlərində ağacların dayanıqlığının artırılmasına müsbət təsir göstərə bilər.

Çıxış zamanı vurğulanıb ki, Şəki-Zaqatala bölgəsində trüfel istehsalının inkişafı gələcəkdə aqroturizmin genişlənməsinə, trüfel ovçuluğu marşrutlarının yaradılmasına, yüksək əlavə dəyərə malik ixrac məhsullarının istehsalına, yeni məşğulluq imkanlarının formalaşmasına və regionun sosial-iqtisadi inkişafına mühüm töhfə verə bilər.

Tədbirin sonunda iştirakçıların çoxsaylı sualları cavablandırılıb, mövzu ətrafında geniş fikir mübadiləsi aparılıb və gələcək əməkdaşlıq imkanları müzakirə edilib.

Xatırladaq ki, “Azərbaycanda trüfel istehsalının təşviqi” layihəsi çərçivəsində maarifləndirici tədbirlərin keçirilməsi davam etdirilir. Bundan əvvəl Lənkəran və Quba rayonlarında belə tədbirlər təşkil edilib. Növbəti seminarın isə Qəbələ rayonunda keçirilməsi planlaşdırılır.