Ulu öndərin anım günü ilə bağlı tədbir
AMEA Mərkəzi Elmi Kitabxanasında Ulu öndər Heydər Əliyevin anım günü ilə bağlı tədbir keçirilib.
Tədbirdə öncə MEK-in baş direktoru, Prof. Məmməd Əliyev çıxış edərək H.Əliyevin Azərbaycana rəhbərlik etdiyi dövrdə gördüyü işlərdən, apardığı islahatlardan danışıb. Həmçinin Azərbaycan gənclərini SSRİ-nin müxtəlif şəhərlərinə ali təhsil almağa göndərməsindən, 20 Yanvar faciəsinə ilk olaraq Heydər Əliyevin etirazından söhbət açıb. Professor onu da deyib ki, Azərbaycanın qazandığı böyük zəfərdə məhz H.Əliyevin izi, rolu var. Çıxışı zamanı baş direktor “Heydər Əliyev İli” çərçivəsində MEK-də keçirilən lektoriyalar, Vikipediyada Heydər Əliyev – 100 məqalə layihəsi, Heydər Əliyevin kəlamlarının video formatda hazırlanması, I Beynəlxalq elmi konfrası da xatırladıb. M.Əliyev MEK tərəfindən Heydər Əliyevin biblioqrafik göstəricisinin ilin sonunadək hazır olunacağını qeyd edib.
Ardınca MEK-in Beynəlxalq əlaqələr şöbəsinin müdiri, siyasi şərhçi Mübariz Göyüşlü çıxışında qeyd edib ki, H.Əliyev Azərbaycanda bütün sahələr üzrə öz izini qoyub, hər zaman Azərbaycanın inkişafı üçün çalışıb. O, Ulu öndərin təşəbbüsü ilə 1971-ci ildə Cəmşid Naxçıvanski adına hərbi məktəbin yaradılmasını o dövrdə hərbi sahədə görülmüş mühüm işlərdən biri olduğunu vurğulayıb. Bildirib ki, məhz həmin məktəbin yetirmələri bu gün Azərbaycan xalqının ən böyük problemini 30 ilə yaxın bir müddətdə işğal altında qalan Azərbaycan torpaqlarını azad etdilər.
Sonra Elektron resusrlar şöbəsinin baş mütəxəssisi Xəyalə Məmmədli çıxış edərək Vikipediyada “Heydər Əliyev İli” çərçivəsində yaradılmış 100 məqalə haqqında danışıb. Qeyd edib ki, məqalələrdən 70-ni özü, 30-nu isə şöbənin digər əməkdaşı Xəyalə Kərimova yaradıb. O həmçinin bu mövzuda məqalələrin yaradılmasını davam etdirəcəklərini deyib.
Daha sonra MEK əməkdaşı Allahverən Allahverdiyev çıxış edərək H.Əliyevin Naxçıvana getdiyi zaman özünün şahid olduğu məqamlardan danışıb, xatirələrini bölüşüb.
Sonda Ulu öndərin həyat və fəaliyyətini əks etdirən video nümayiş olunub.