Rusiya paytaxtı Moskvada yaşayıb müxtəlif sahələrdə, o cümlədən də diaspor işində fəal çalışan qadınlarımızı Moskva azərbaycanlıları milli-mədəni muxtariyyəti öz platformasında bir araya gətirib. Müvafiq görüş yenilənmiş və qısa müddət ərzində bir sıra mühüm əhəmiyyətli tədbir və təşəbbüslərə imza atan Moskva azərbaycanlıları diaspor təşkilatının ofisində 23 oktyabr 2022-ci il tarixində gerçəkləşib. 
Görüşdə ictimai, elmi, mədəni və başqa humanitar sahələrdə böyük xidmətləri olan qadın soydaşlarımız iştirak ediblər ki, onların arasında məktəb və ali təhsil ocaqlarının müəllimləri, tanınmış elmi-pedagoji işçilər, yazıçı və şairələr, publisistlər, dizaynerlər, modelyerlər, rəssamlar, iş adamları, mədəniyyət xadimləri və s. olub. Onlayn-formatda görüşə Moskvada yaşayıb işləyən Azərbaycanın əməkdar incəsənət xadimi, müğənni Nuriyə Mansurova da qatılıb. 
Görüş iştirakçılarını salamlayan Moskva azərbaycanlıları diaspor təşkilatının rəhbəri Bəxtiyar Həsənov müxtəlif sahələrdə uğurlu fəaliyyət apardıqlarına və diaspor həyatında aktiv iştirak etdiklərinə görə qadınlarımıza dərin minnətdarlığını bildirib. Sədrlik etdiyi təşkilatın ümumilikdə azərbaycanlıların həmrəyliyi istiqamətində konsepsiyasından və həmin konsepsiyanın məramlarının reallaşması məqsədilə aparılan işlərdən ətraflı məlumat verən Bəxtiyar Həsənov qadınlarımızın da bu sahədəki böyük potensialını, onların quruculuq rolunu xüsusi vurğulayıb.    
Öz növbəsində tədbirdə söz alan qadın fəallarımız səmərəli və işgüzar əməkdaşlıq formatının yaradılmasına görə şəxsən Bəxtiyar Həsənova və Moskva azərbaycanlıları diaspor təşkilatının idarə heyətinə təşəkkürlərini ifadə ediblər. Onların sözlərinə görə, bu əlverişli və faydalı əməkdaşlıq şəraiti Azərbaycan xalqının milli-mədəni irsinin və Azərbaycan həqiqətlərinin geniş təbliğatı üçün gözəl imkanlar açır, bir sıra maraqlı və perspektivli layihələrin müvəffəqiyyətlə gerçəkləşməsinə zəmanət yaradır. 
Fikir mübadiləsi formatında keçən görüşdə iştirakçılar Azərbaycan dilinin, mədəniyyətimizin, adət-ənənələrimizin təbliği istiqamətindəki konkret tədbirlərin həyata keçirilməsi və eyni zamanda Moskvada Azərbaycan mədəniyyət mərkəzinin və bu mərkəzin nəzdində müxtəlif tədris kurslarının açılması məsələlərini ətraflı nəzərdən keçiriblər. Qeyd olunub ki, aktiv şəkildə reallaşdırıla biləcək bu müştərək fəaliyyət milli bayramlarımızın və irsimizin sərgilənəcəyi fərqli festivalların daha da yüksək səviyyədə keçirilməsi ilə nəticələnəcək.
Xüsusi maraq doğuran təkliflər arasında gənclərimizin bu işə aktiv cəlb edilməsi, onlara məktəb və ali təhsil ocaqlarında yardım göstərilməsi, onların sonradan işlə təmin olunması, təcrübəli Azərbaycan müəllimlərinin müxtəlif fənlər üzrə repetitor fəaliyyətinin təşkil edilməsi, çoxuşaqlı və aztəminatlı ailələrə köməklik, təşkil olunacaq tədbirlərdə cavanlarımızın tanış olmaları və gələcəkdə ailə yaratmaları üçün münbit şəraitin yaradılması da səsləndirilib və geniş müzakirə olunub. 
Bütün təkliflərin əhəmiyyətini vurğulayan Moskva azərbaycanlıları lideri Bəxtiyar Həsənov rəhbərlik etdiyi təşkilat daxilində özünün ayrıca strukturu, idarə heyəti və fəaliyyət planı olmaqla Qadınlar Birliyinin təsis edilməsini təklif edərək bu yeni yaradılacaq quruma hərtərəfli dəstəyin veriləcəyini qeyd edib. 
Görüşdə səsləndirilmiş bütün aktual ideya və təkliflərin müzakirəsi qeyri-formal şəraitdə, çay süfrəsi zamanı davam etdirilib. Görüşü daha da xoş təəsüratlı və yadda qalan isə şer və mahnılarımızın oxunmasını özündə ehtiva edən qısa mədəniyyət proqramı edib.