Polşada Xocalı soyqırımı qurbanlarının xatirəsinə həsr olunmuş anım lövhəsinin açılış mərasimi keçirilib. Tədbirin açılışını Polşanın İslam müftisi Tomasz Miśkiewicz edib.

Yenicag.az xəbər verir ki, Müftü Tomasz Miśkiewicz Polşanın İslam dini icmasının rəhbəridir və ölkədəki müsəlman icmasına dini və mədəni istiqamətdə rəhbərlik edir. O, İslamın sülh və ədalət dəyərlərini təbliğ edir, müxtəlif icmalar arasında dialoqun və birgəyaşayışın möhkəmlənməsi üçün fəal çalışır.

Mərasim zamanı Müftü Miśkiewicz Xocalı soyqırımı qurbanlarının ruhuna dualar oxuyub, Azərbaycan və Polşanın dost ölkələr olduğunu qeyd edib. O vurğulayıb ki, bu anım lövhəsi yalnız Xocalı soyqırımının deyil, ümumiyyətlə, haqsız yerə əziyyət çəkən bütün insanların xatirəsini əbədiləşdirən bir simvoldur. Soyqırımların dini, irqi və milliyyəti olmadığını bildirən müftü, Xocalı qurbanlarına və dünyanın müxtəlif yerlərində müharibələrdən əziyyət çəkən insanlara Allahdan mərhəmət və yardım diləyib.

Daha sonra Azərbaycan Respublikasının Polşa Respublikasındakı fövqəladə və səlahiyyətli səfiri Xanım Nərgiz Qurbanova çıxış edərək Müftü Tomasz Miśkiewiczə təşəkkürünü bildirib. Səfir tədbir iştirakçılarına Xocalı soyqırımı və onun qurbanları haqqında ətraflı məlumat verib, bu faciənin təkcə Azərbaycan üçün deyil, bütün insanlıq üçün bir ibrət dərsi olduğunu vurğulayıb.

Ardınca Nərgiz Qurbanova və Müftü Tomasz Miśkiewicz birlikdə anım lövhəsinin lentini kəsərək rəsmi olaraq onun təqdimatını ediblər. Açılış mərasimindən sonra tədbir iştirakçıları Xocalı soyqırımı qurbanlarının ruhu naminə verilən ehsan mərasimində iştirak ediblər.

Qeyd edək ki, son illərdə həm Azərbaycanın Polşadakı səfirliyi, həm də Polşa Azərbaycanlıları Şurası tərəfindən mütəmadi olaraq Xocalı soyqırımı ilə bağlı anım tədbirləri təşkil edilir. Məsələn, 2024-cü ildə, Xocalı soyqırımının 32-ci ildönümündə, həm Azərbaycanın Polşadakı səfirliyi, həm də Polşa Azərbaycanlıları Şurası genişmiqyaslı tədbirlər həyata keçirmişdir. Bu kimi davamlı fəaliyyətlər Xocalı həqiqətlərinin Polşa ictimaiyyətinə və beynəlxalq arenaya çatdırılmasına xidmət edir.

Xatırladaq ki, PAŞ İdarə heyətinin üzvü Şamo Qurbanov tərəfindən Xocalı soyqrımı ilə bağlı sosial şəbəkələrdə videomüraciət yayımlanıb:

//www.instagram.com/reel/DGjB4utPHig/?igsh=ZHk2ODdicTc4ZGFp

//www.facebook.com/share/r/1DoTcriEGU/?mibextid=wwXIfr

Xocalıya ədalət!