Rusiyanın Orenburq vilayətində dahi Azərbaycan şairi və mütəfəkkiri Məhəmməd Füzulinin 530 illik yubileyinə həsr olunmuş “Şeir xəzinəsi: Füzuli irsi ilə dialoq” beynəlxalq qiraət müsabiqəsi başa çatıb.

AZƏRTAC xəbər verir ki, Yaşar Məsimovun rəhbərliyi ilə Orenburq Azərbaycanlılarının Regional Milli-Mədəni Muxtariyyəti (ARMM) tərəfindən təşkil olunan müsabiqə Rusiya, Azərbaycan, Qazaxıstan və Hindistandan olan iştirakçıları bir araya gətirib.

Müraciətlərin qəbulu 2024-cü il oktyabrın 15-də başlayıb və 2025-ci il yanvarın 31-də başa çatıb. Müsabiqədə 7-81 yaş arası 80 qiraətçi iştirak edib. Müsabiqə komissiyası təqdim olunan videoçarxları nəzərdən keçirərək dörd yaş qrupu, həmçinin “Tamaşaçıların rəğbəti mükafatı” xüsusi nominasiyası üzrə qalibləri müəyyən edib.

Orenburqdakı Azərbaycan Mədəniyyət Mərkəzində qaliblərin təntənəli mükafatlandırma mərasimi keçirilib. Tədbirdə 1-ci, 2-ci və 3-cü yerlərin qalibləri, eləcə də “Tamaşaçıların rəğbəti mükafatı”nın qalibi pul mükafatları və diplomlarla, qalan iştirakçılar isə sertifikatlarla təltif olunub.

Orenburq ARMM-nin sədri Yaşar Məsimovun qeyd etdiyi kimi, “müsabiqə bir daha sübut etdi ki, poeziya sərhəd tanımır və müxtəlif millətlərdən və yaşdan olan insanları birləşdirir. Füzuli irsi insanların qəlbində yaşamaqda və onları yaratmağa ruhlandırmaqda davam edir”.

Təşkilatçıların sözlərinə görə, iştirakçıların qiraət nümunələri 200 mindən çox baxış toplayıb. Müsabiqə müxtəlif mədəniyyətlərin və ölkələrin nümayəndələrini böyük şairin irsi ilə dialoqda birləşdirərək geniş ictimai rezonans doğurub.

//youtu.be/Oxl0Hwjewns?si=DGHYK1xX8mjftWMs