Misir-Azərbaycan Dostluq Cəmiyyəti xalqlar arasında mədəni və humanitar körpüdür və bu sahədə ən fəal təşkilatlardan biridir. Cəmiyyətimizdə bəlağət, ərəb dili, Azərbaycan dili, Qurani-Kərim qiraətləri, eləcə də müxtəlif peşələr pulsuz öyrədilir. Bu kursları uğurla başa vuranlara diplomlar verilir.
Bunu Misirdə Azərbaycan diasporunun sədri, Misir-Azərbaycan Dostluq Cəmiyyətinin İdarə Heyətinin sədri, Qahirə Universitetində Azərbaycan dili müəllimi tədqiqatçı-alim Seymur Nəsirov Birləşmiş Ərəb Əmirliklərinin “Nabd əl-İmarat” qəzetinə müsahibəsində deyib (//nbdelemirate.ae/162976.html).
Diaspora sədri müsahibəsində, həmçinin cəmiyyətin fəaliyyət istiqamətləri və hədəfləri barədə danışıb. Qeyd edib ki, cəmiyyət xalqlar arasında dostluq, mədəniyyət və iqtisadi əlaqələrin gücləndirilməsinə töhfə verir, konfranslar, seminarlar və elmi mühazirələr təşkil edir. Bundan başqa elmi kitabxanaların və araşdırma mərkəzlərinin yaradılmasına, dövri elmi, mədəni jurnalların nəşrinə, az təminatlı tələbələrə və ailələrə maddi yardımların verilməsinə, onların yataqxana ilə təmininə, peşəyönümlü layihələrin yaradılmasına və dəstəklənməsinə yardım edir.
S.Nəsirov tədris prosesi 23 il bundan qabaq az sayda tələbə ilə başlansa da, onun rəhbərliyi altında indi təhsil alanların sayı çoxalıb. Hazırda cəmiyyətdə oxuyanlar arasında dünyanın müxtəlif ölkələrindən gələn gənclər də çoxdur.
“Cəmiyyətdə az təminatlı ailələrin övladlarına müxtəlif peşələr, o cümlədən xalça toxunmasını öyrədirik. Bu da həmin ailələrin gəlirlərinin artmasına yardım edir”, - deyə S.Nəsirov vurğulayıb.
Müsahibədə qeyd olunub ki, S.Nəsirov bu yaxınlarda Misir Prezidenti Əbdülfəttah əl-Sisi tərəfindən birinci dərəcəli “Elm və Fənlər” ordeni ilə təltif olunub. Misir Prezidentinin şəxsən özü tərəfindən təqdim edilən bu orden elmin inkişafı və yayılması sahəsində müstəsna xidmətləri olmuş görkəmli alim və maarifpərvər şəxslərə verilir.
Müsahibəni tanınmış jurnalist-yazar Şirin Fərid götürmüşdür.