Noyabrın 3-də Moskvada, Rusiya Xalqlar Dostluğu Universitetinin (RXDU) Filologiya Fakültəsində Nizami Gəncəvi adına Azərbaycan Ədəbiyyatı Auditoriyasının açılış mərasimi keçiriləcək. Tədbirin təşkilatçısı Moskva vilayəti azərbaycanlıları milli-mədəni muxtariyatıdır.

Auditoriyanın məqsəd və təyinatı zəngin irsi olan Azərbaycan ədəbiyyatını təbliğ etməkdir. Məlumat stendlərində azərbaycan-rus ədəbi əlaqələri və milli ədəbiyyatın dünya mədəniyyətindəki rolu xüsusi vurğulanır.

Nizami Gəncəvi adına Azərbaycan Ədəbiyatı Auditoriyası RXDU-nun Filologiya Fakültəsinin dosenti, filologiya elmləri namizədi Anar Həsənovun ideyası əsasında fakültənin dekanı, filologiya elmləri doktoru, professor Viktor Barabaşın dəstəyi və yaxından iştirakı ilə gerçəkləşib. Layihənin məzmun və dizaynını Rusiya Təbiət Elmləri Akademiyasının müxbir üzvü, pedaqoji elmlər doktoru Nizami Əliyev, dosent Anar Həsənov və Moskva vilayəti azərbaycanlıları milli-mədəni muxtariyyatının sədri Elşən İbrahimovla birgə tərtib ediblər.

Təntənəli mərasimə RXDU-nun elmi-pedaqoji kollektivi, Azərbaycan və Rusiyanın dövlət və qeyri hökümət təşkilatlarının nümayəndələri, diaspor fəalları və KİV mənsubları dəvət edilib.